Cu protocol sirbi mi ta yama un cordial bon nochi y bon bini na e Manifestacion Cultural pa conmemora e fecha natalicio di Nos Libertador Gilberto François ‘Betico’ Croes, cu awe si e tabata na bida lo a cumpli 85 aña.
Un anochi durante cual nos ta rindi honor na e gran persona, e estadista, e gran lider cu a sacrifica su bida pa lucha pa asina awe Aruba ta un pais autonomo den Reino Hulandes.
Betico a dedica gran parti di su bida na e lucha estatal. Di profesion un maestro di scol cu tabata stima su alumnonan y tabata inculca den nan e importancia pa studia. Destino a pone cu e meneer di scol aki, tata di famia di 4 yiu, cu tabatin Aruba den su mente y curason, tabata esun scogi pa sigui cu e lucha di e libertad di Aruba.
Betico tabata hende di tur hende, un ser amabel, un persona masha special cu un carisma grandi, cu un gran amor pa e ser humano y cu un vision: pa Aruba ta un pais liber. Un lider cu a lidera cu su curason, cu stima pais Aruba, manera un yiu, poniendo semper pueblo di Aruba na prome luga.
Den varios di su discursonan cu ela tene, Betico a demostra su amor incondicional cu e tabatin pa su pueblo y e expresionnan aki ta sigui motiva y inspira nos pa nos sigui su ehempel. Nos ta recorda e frase cu ela menciona den su ultimo discurso “Mi no ta un tata di un famia chikito cu ta consisti di homber, muher y cuatro yiu, pero mi ta un tata particular, tata di un famia grandi, tata di henter e pueblo di Aruba”. Y tambe “E felicidad cu mi ta desea pa mi propio yiunan ta e felicidad cu mi ta desea pa henter pueblo di Aruba”. Dichonan y expresionnan cu mensahenan profundo cu ta demostra cuanto amor e tabatin pa su pueblo y Aruba.
Betico a demostra su amor grandi pa su patria tambe atrabes di cu accionnan y a logra cosnan grandi pa nos Pais Aruba. Ela sa di uni pueblo di Aruba pa un solo meta, esta haci di Aruba un pais autonomo den Reino Hulandes. Semper Betico a bisa cu no tin distincion di religion, ni di rasa, pober of rico, di cual distrito cu bo ta of unda bo a nace, si bo a haci di Aruba bo hogar, bo ta pertenece na e pida baranca aki.
Pa su manera di ta, Betico a haya masha respet y admiracion di pueblo di Aruba.
Prome cu Status Aparte, Betico a haci nos consciente di e importancia di nos identidad, “Ken ta Aruba y ken ta un Arubiano’. Ta ken nos ta.
Betico a percura pa implanta e amor y grandesa den e identidadnan di nos patria. Ela inculca den nos e importancia di tin nos propio escudo, himno, bandera, ortografia, moneda, gobernado, gobierno, parlamento, Banco Central y hopi otro institucionnan. E simbolonan aki ta importante pa sinti nos orguyoso di ta Arubiano, crea amor y stima nos pais.
Deporte y cultura tambe tabata masha importante pa Betico ya cu e tabata considera cu esakinan ta contribui pa uni un patria. Betico a siña nos tambe pa stima nos musica, asina tambe ela funda e grupo tan popular y gusta cu awendia yama ‘Grupo di Betico’.
Deseo grandi di Betico tabata pa ora Aruba a haya su Status Aparte pa nos ta orguyoso di ta un Arubiano, orguyoso di Aruba y di su simbolonan di identidad, nos cultura, historia y idioma y pa e futuro generacion sigui cu e lucha pa mantene e Status Aparte y pa no laga ningun hende kit’e for di nos. ‘Arubiano orguyoso nos tur ta, hamas y nunca nos mester lubida’.
Betico a logra su meta door di su perseverancia, determinacion y specialmente e amor cu e tabatin pa nos pais. Laga cada un di nos tuma esaki como ehempel pa enfrenta y surpasa cada reto den nos bida. Cu Betico su expresionnan, accionnan y legado keda semper bibo den nos mente y ta nos guia y inspiracion den nos bida diario y cu ayudo di Dios nos por sigui hiba nos Pais padilanti.
Durante e dianan cu a pasa aki, ya a bira un tradicion cu mi ta bishita scolnan basico prome cu Dia di Betico. Mi curason a yena cu alegria ora mi a experencia con hopi nos muchanan sa di nos historia di Betico. Cu hopi entusiasmo nan ta prepara pa celebra e gran dia nacional aki conmemorando Nos Libertador. Masha danki na tur e juffrouwnan y maestronan di scol pa inculca esaki den e muchanan.
Ta cu gran placer tambe mi a experencia diadomingo pasa durante cual famianan a disfruta e scavenger hunt di ‘Kiba Coco’ y a siña hopi mas di e historia di Betico. Mayornan hunto cu nan yiunan a bishita varios sitio caminda actonan historico a tuma luga den auto dorna cu blas, yen ambiente y alegria. Un dushi diadomingo durante cual por a comparti entre famia, canando den e pasonan di Betico y siña mas di e historia y e balor di nos gran Libertador.
Mi ta extende un cordial invitacion na cada un di boso pa bin presencia mayan mainta e ceremonia protocolar pa 8’or y mei aki na Plaza Betico Croes durante cual nos lo duna e homenahe, respet y honor na Nos Libertador Gilberto Francois (Betico) Croes riba e dia di su fecha natal. Danki pa bin presencia e Manifestacion Cultural awe nochi y un danki special ta bay pa e Comision Celebracion Dianan Nacional cu a organisa e tremendo Scavenger Hunt di “Kibra Coco” y tambe e programa cultural di awenochi y e acto protocolar mayan. Masha Danki! Danki tambe na Betico su casa Glenda, su yiunan Gisette, Glenbert, Junior y Glendeline di a comparti boso tata cu Pais Aruba.
Na final mi kier comparti un poema dedica na nos Libertador Betico Croes
Amor pa Aruba a motiva Betico pa pusha y kibra tur barera.
Amor a percura cu nunca nos libertador a perde fo’i bista e meta tan anhela.
E lucha incansabel pa nos suela, e reconocimento di nos isla su derechonan.
Betico a kere firmemente cu nos pais bendiciona merece di bira patria.
Paso no ta importa fo’i unda bo ta bin, e baranca aki ta di nos tur: Arubiano nos ta.
Betico, danki pa stima nos pais.
Na nomber di Gobierno mi ta desea henter Pueblo di Aruba, un Feliz Dia di Betico.