Local

Durante Evento Turistico Mas Grandi Di Caribe: Chta Travel Marketplace: A.T.A. Y Socionan Turistico A Sostene Reunionnan Fructifero


ORANJESTAD,Aruba

E siman aki, Aruba tawata presente na e evento mas grandi den e industria turistico y hotelero pa nos region cu a tuma luga na Bahamas. E evento di Caribbean Hotel & Tourism Association ta duna proveedornan di turismo e oportunidad pa cera conoci, reuni, of negocia sea cu socionan existente of nobo. Den e caso aki cu enfoke riba e mercado di Norte America.

Ehecutivonan di A.T.A. hunto cu AHATA, AAA y nos hotelnan/socionan local a enfoca riba reuni cu tour operadornan existente y nobo. Presente di A.T.A. tawata CEO Ronella Tjin Asjoe-Croes – CMO Sanju Luidens-Daryanani – North America Area Director Ed Malone – Co-op advertising coordinador Adwina Arends y North America Marketing Manager Ayerim Maduro. Di AHATA tawata presente CEO Tisa LaSorte y di AAA Air Service Development Manager Jo-Anne Arends. E agenda tawata extensivo, unda a reuni no solamente cu ehecutivonan di tour operador Mericano y Canades, pero tambe cu algun di otro paisnan incluyendo Brasil y Italia. Reunionnan a inclui tour operadornan cu ta produci mas negoshi pa Aruba, incluyendo Expedia y Apple Leisure Group. Reunionnan manera esaki ta duna oportunidad pa negocia cualkier aspecto, si esaki ta rekeri. Tambe a papia entre otro di e ultimo desaroyonan pa 2020 y con turismo di Aruba ta compara cu otro destinacionnan den Caribe.

Mirando e resultadonan pa 2019 pa cu e mercado Norte Americano, esaki a mustra un crecemento di 13% te cu september 2019. E entrada pa medio di turismo ta uno fuerte. Despues di 3 aña sumamente fuerte pa e mercado Norte Americano, proyeccionnan pa 2020 ta mas modera y ta enfoca si riba aumento di entrada pa medio di turismo cu 2%. Pa loke ta trata cantidad di bishitante proyeccion pa 2020, ta pa Merca crece esaki cu 1% y pa Canada crece cu 4%.

Reunionan manera CHTA ta sumamente importante pa Aruba, mirando cu e negoshi di Tour Operator incluyendo Online Tour Operators ta representa aproximadamente 50% di e total di negoshi cu ta produci turistanan for di Merca pa Aruba.

Aspectonan pa tene na cuenta ta inclui entre otro; hotelnan den e region Caribense cu ta sigui haci nan re-entrada despues di tabata cera pa construccion/renovacion pa e dañonan causa door di horcannan den e ultimo añanan. Fuera di esaki e expansion di productonan hotelero nobo na entre otro Republica Dominicana, Jamaica y Mexico ta continua grandemente. Esaki ta componentenan cu ta haci e competencia hopi mas fuerte pa Aruba. Nos destinacion ta sigui posiciona su mes como un di e destinacionnan preferi den Caribe, esaki meymey di tur otro desaroyo ta keda sobresali.

Despues di CHTA, e delegacion di Aruba, a reuni separadamente na Miami cu diferente ehecutivonan representando hotelnan di Aruba. A pasa riba e resultadonan di 2019 y a enfoca riba expectativa, proyeccion y strategianan pa Aruba pa 2020-2021. 

Riba e portetnan por mira representantenan di Apple Leisure Group y representantenan di A.T.A. como tambe un potret cu Minister di Turismo di Bahamas Sr. Dionisio D’Aguilar – Presidente di Caribbean Hotel & Tourism Association (CHTA) Patricia Diaz – CEO di CHTA Frank Comito –  ehecutivonan di A.T.A. y AHATA. Otro potret ta mustra ekipo di Marriott HQ y tambe un potret cu e ekipo di Holiday Inn HQ (IHG) – tur ta basa na Miami.


Related posts

Minister Xiomara Maduro a ricibi bishita di Sr. Dufi Kock

EA News Author

Nos hendenan cu limitacion financiero no por bai ni djentista ni specialista mas

EA News Author

Minister Xiomara Maduro ta informa: Aruba ta preparando pa e evaluacion door di Caribbean Financial Action Task Force (CFATF) di e integridad di e sistema financiero na augustus di 2021

EA News Author

Leave a Comment