FeaturedLocal

Durante Fiesta Tipico den Bario: Minister di Cultura Xiomara Maduro a reconoce Papito Rafael y Eric Rincones

Reconocimento Papito Y Eric 01

Diadomingo ultimo durante e ‘Fiesta Tipico den Bario’, organisa pa Fundacion Union di Tipiconan Rubiano na Centro di Bario Dakota, Minister Maduro tabata tin e e honor y placer pa reconoce dos Baluarte Cultural pa nan contribucion, pa yuda mantene y promove nos cultura musical den nos barionan y na Dakota muy en particular

Papito Rafael

E prome persona cu a ricibi un reconocimento ta Rignald Eleuterio Rafael. Den su discurso e mandatario a duna un breve historia di ken ta Papito. Papito a nace y lanta den e bario di Dakota. E ta e ruman menor di e total di cinco ruman di cual uno a fayece. Papito ta casa cu Marlin Croes y nan tin cuatro yiu, Marlisa, Marisol, Rayshell y Marigin. Papito ta bini di un famia musical, su bisawelo, welo y tata tabata musico. Musica a trece un cambio completo den su bida. 

E bida artistico

For di mucha desde 2e, 3e klas di scol basico e tabata gusta musica caba. Un dia tabata tin un evento na scol y mester a forma un coro pa canta y toca. E tempo ey meneer Roy Sneek tabata su meneer y a puntra Papito si e kier toca y a dun’e un tambora chikito pa bati riba dje. Meneer Sneek a keda wak Papito y a keda impresiona. Di e tempo ey Papito a cuminsa toca tambora y e smaak a drenta curpa. Papito tabata traha su mesun drumset y e tapa di bleki di lechi KLIM e tabata uza como “dish” di drumset. 

Un dia yegando di trabao ruman homber di Papito cu yama Eric a bin discubri un dia cu Papito ta tocando ariba su drum. Y aki mirando su interes Eric a mustr’e algun cos cu Papito mester haci y tambe algun tecnica di drums. Y asina riba su mes, Papito a keda desaroya e musica, hunto cu timbal y otro instrumentonan di percusion. Asina Papito a keda desaroya e musica, te ora el a bira un gran percusionista.   

Desaroyo Musical

For di mucha caba, Papito tabata gusta bati ritmo. Su Tata tambe tabata percussionista, principalmente cu e instrumentonan conga y bongo. Esaki tabata tin su influencia fuerte den famia. Papito tambe tabata tin un pasion pa esaki y e tambe kier a sigui desaroya den e parti ritmico. Na inicio Papito a cuminsa toca cu Gaita Los Paranderos, consisti di muchanan talentoso di bario Dakota cu tabata biba cerca di otro. Papito a forma parti di varios grupo y banda, The Moondogs, Otty’s y asina a bin ta sigui desaroya su talento. Un biaha Juancho Ignacio a bira malo, net dia cu nan mester a toca na un fiesta. Y Juancho tabata e cantante principal, banda di Hubert Ignacio cu Roy Olive den felis memoria. Aki ta caminda Papito a ofrece su mes pa canta e cancionnan cu Juancho Ignacio tabata canta y asina a duna Papito un oportunidad pa canta. Papito a sorprende tur e musiconan ora el a cuminsa canta. For  di eynan, Papito a sigui canta te awe y nan a hacie cantante solista. Tambe Papito a traha un temporada “freelance”, Papito a cuminsa haya hopi trabou cu banda na hotel, el a traha na Sheraton Hotel, Divi Divi Hotel, Marriot Hotel, caminda ela toca cu cu Efigenio Thiel (Efi dfm), kende ta ruman di Robert Thiel y Omo di Jeon Thiel. Hunto cu Robert Jeandor, nan a forma e Trio di Marriot. Papito a yega di toca freelance cu “Los Condes” y “Arubian Band”, “Triple S”. Despues Papito a lanta “Papito y su Doble Sabor”, nos por corda e famoso cancion “Manolo tey”. Papito a gana tumba festival na aña 1993 cu e cancion “Bagadi Bagada”, na 1994 cu e cancion “Lolle Piet”, na 1995 cu e cancion “Hala pa nos pasa”, na 1998 cu e tumba “Aruba t’ey tembla” y na 2000 cu “Den memey”. 

Tambe Papito a toca na Boneiro cu los “Condes”. Papito a participa tocando tambe den ‘Concierto di Siglo’ hunto cu Padu del Caribe na Boneiro, Corsou y Hulanda. Na Hulanda, ‘Papito y su Doble Sabor’ a haci un gira di 1 luna hunto cu ‘Doble R’. Nan a toca tambe na Calle 8, Miami Bay Side, Bay Front y nan a graba na Santo Domingo cu “Triple S”. “Papito y su Doble Sabor” a haci grabacion na e “Casa Disquera Fuentes” na Colombia. 

Minister Maduro a yama danki tambe na henter su famia, masha danki pa e tempo, e dedicacion y contribuicion na e bunita y exitoso carera di Papito Rafael y a trece dilanti cu e reconocimento aki ta dedica na e famia tambe. Den presencia di famia y especialmente Mama di Papito, un señora di 97 aña, Minister a entrega Papito un plakaat cu tin graba e siguiente dedicatorio: “Gobierno di Aruba, Reconocimento na Sr. Rignald Eleuterio (Papito) Rafael. Pa deleita nos cu su talento musical y artistico pa mas di 50 aña”. 

Eric Rincones

Un otro persona cu Gobierno di Aruba a reconoce durante e evento aki ta Sr. Eric Serafin Rincones cu ta sali di un famia di musico. Su tata tabata toca guitara y cuatro. Eric su instrumento stima ta guitara. Eric ta casa cu Evelina Dirksen y nan tin tres yiu, Everick, Elwin y Edmar. Eric y Evelina semper a motiva nan yiunan den musica y deporte. Desde un edad hoben Eric tabata forma parti di un trio di su bario cu tabata toca den Aruba Caribbean hotel.

Estudio, Docente di Canto y Musica

Eric a studia pa docente pa Arubaanse Pedagogische Academie. Desde 1971 pa 2010, Eric tabata docente di scol basico y canto y ultimo cabezante na Pius X School, casi 40 aña como docente activo educando nos muchanan. Desde 1988 Eric ta dirigente di coro ‘Vlam di Amor”. Na aña 2023, Biblioteca Nacional Aruba a presenta un compilacion di tur cantica di e ultimo 30 aña cu e obhetivo pa no lubida e canticanan y pa documenta un parti di historia di musica na Aruba cual composicionnan di Eric tambe ta forma parti di nos herencia cultural.

Eric keto bay activo

Eric awo tin 74 aña, ta pensionado pero ta keto bay activo como docente di canto y musica pafo di scol, dunando su cooperacion manera semper. E ta dirigente di banda y coro durante di festivalnan tipico manera Dande y Propio Composicion, Festivalnan carnavalesco manera Tumberito, pa presentacion di coro durante Ceremonia Protocolar ‘Dia di Betico y Himno y Bandera’. Na un cantidad di ocasion su composicionnan a sali ganador y den premio cu cantantenan conoci manera e.o. Silvhyanne Vrolijk y tambe Eric su nieto Brandon Rincones. Eric ta compositor di cancionnan pa Voz-i-Landia Escolar, Festivalnan Cultural manera “Un Canto na nos Himno y Bandera” y Festival di Dande y Propio Composicion. Ademas Eric ta musico activo di Tipico Macuarima, Rondalla Universo hunto cu mas guitarristanan hopi conoci y tambe cu e banda di OPPA. 

Eric a y ta sigui yuda na numeroso festivalnan di canto sea pa set-up, hurado y train e muchanan di diferente  scol na Aruba. Tambe Eric ta sobreviviente di Covid-19 na aña 2020. Eric ta tambe keto bay un ferviente coach di baseball pa decadanan. Eric a compone, toca y gana na hopi ocasion, numeroso pa por wordo conta den cifranan. Eric tin un amor pa musica y semper ta comparti su conocimento, creatividad y talento cu otronan, pa nan tambe por siña di dje, pa aprecia y stima nos cultura atrabes di musica y canto. Unda cu mira Eric e ta wordo reconoci pa su alumnonan como Meneer Eric, un docente cu a cumpli cu tur pasion su tarea pa educa y prepara su alumnonan pa nan saca lo miho di e talento cu nan ta pose, sea cu ta den e ramo di canto, musica of deporte. 

E mandatario a reconoce e famia cu semper a sostene y apoya Eric, su estimada esposa Sra. Evelina Rincones-Dirksen, cu igual cu Eric tin un pasion masha grandi pa musica, canto y deporte. 

Eric aunke e mes no ta di e bario di Dakota, pero manera e slogan “Dakota tur dia”, asina mes tur dia pa hopi aña Meneer Eric Rincones a traha como docente y a pasa hopi di su tempo den Dakota educando y guiando nos mucha y hobennan riba e bon caminda. Pesey mes Eric ta masha stima y aprecia den nos comunidad y especialmente pa e bario di Dakota, unda cu e la bin ta docente di scol y manager di Center League den baseball. 

Den presencia di famia, Minister di Cultura a entrega Eric un plakaat cu tin graba e siguiente dedicacion: “Gobierno di Aruba, Reconocimento na Sr. Eric Serafin Rincones, pa mas di 50 aña den su carera artistico como musico activo y docente musical”. 

Despues di a gradici Papito y Eric y entrega nan reconocimento, Minister Maduro a gradici Fundacion Union di Tipiconan Rubiano, pa organisa durante aña 2023 un total di 8 ‘Fiesta Tipico den Bario’, cu e meta pa mantene nos cultura di musica tipico bibo den nos barionan. Alabes e mandatario a gradici tur grupo Tipico, tur musico y cantante pa nan presentacion durante e diferente ‘Fiestanan Tipico den Bario’ y tambe na e comunidad cu ta asisti y apoya e eventonan aki. Por ultimo danki UTR hunto cu UNOCA pa haci esakinan posibel. Danki pa kere den Aruba y ban sigui sostene loke ta di nos, pasobra “Cultura Bo tin cu Bib’e!.

Reconocimento Papito Y Eric 10Reconocimento Papito Y Eric 05Reconocimento Papito Y Eric 09Reconocimento Papito Y Eric 04Reconocimento Papito Y Eric 08Reconocimento Papito Y Eric 03Reconocimento Papito Y Eric 07Reconocimento Papito Y Eric 02Reconocimento Papito Y Eric 11Reconocimento Papito Y Eric 06

Related posts

Proyecto di Hospital mester a caba na 2018

EA News Author

No falta respet pa DIOS

EA News Author

Minister Maduro di Finansa ta informa: Parlamento di Aruba ta aproba presupuesto di pais Aruba pa aña 2024

EA News Author

Leave a Comment

Whatsapp Message