Diadomingo ultimo a tuma luga e di shete ‘Fiesta Tipico den Bario’, organisa pa Fundacion Union di Tipiconan Rubiano. Un iniciativa cu cada bes ta bira mas grandi y cu Minister Xiomara Maduro ta sostene y apoya, pasobra hunto nos tin cu sigui promove y biba nos cultura. Nos mester yuda mantene nos musica Tipico y nos folklore bibo den tur nos barionan y pa e por keda biba pa nos generacionnan nos dilanti. Gobierno di Aruba ta gradici UNOCA pa pone fondonan disponibel pa yuda cubri gastonan pa por organisa e fiesta tipico cultural.
E Fiesta Tipico den Bario, ta un momento special tambe caminda den nomber di Gobierno di Aruba, Minister Maduro di Cultura ta haci uzo di oportunidad pa brinda reconocimento na esnan cu ta sostene, promove y mantene nos folklor bibo den nos barionan. Diadomingo ultimo a toca turno na Noord y Minister di Cultura a reconoce dos Baluarte Cultural di e distrito pa nan contribucion di yuda mantene y promove nos cultura musical.
Sr. Chonai Faro
E prome persona cu a ricibi un reconocimento tabata Sr. Isnardo Epifanio Faro (Chonai). Chonai, manera tur hende conoce, a nace dia 22 di maart 1945 y ta di e bario di Sabana Liber. Dia 17 di april di e aña aki ela cumpli 50 aña casa cu Sra. Petra Faro de Cuba, cual matrimonio a haya 2 yiu homber (Jorge y Junior), 4 nieta, 5 nieto y 1 bisanieto.
Den su discurso e mandatario a elabora riba e trayectoria amplio di Chonai kende pa 35 aña a sirbi como maestro di scol. Ademas Chonai tin mas di 55 aña como miembro fiel y e ta indiscutiblemente esun cu mas aña como miembro continuo di e prestigioso coro di Misa di Santa Anna. Desde cu Chonai a yega di su estudio for di Hulanda, ela dirigi e koor hunto cu defunto Zr. William riba su orgel. Semper ela keda e man drechi di e koor, caminda e ta zorg pa muziek, traha programa, traha cu e CD player y mixer pa e microphonenan y tambe dirigi e coro ora cu no tin dirigente. Ora tin misa special e ta zorg pa por tin tocadornan y hopi biaha Chonai ta yuda den bestuur y comision di actividad. Chonai tambe a participa den tur festival aki na Aruba y na Corsow unda cu coro Santa Anna a bai canta.
Banda di koor di misa di Noord, Chonai a yega di canta den varios coro na Aruba y e ta fundador y doño di basta agrupacion, di cual nos por menciona su popular banda musical ‘La Selecta’ den cual bastante musico y artistanan local y internacional a debuta. Chonai ta forma parti te ainda di Tipico Arco Iris, Tico y sus Estrellas, Patan Farro and Friends y tambe Tommy Figaroa and Friends. Pa e temporada di mas dushi di aña, semper bo ta haye den su gaita. Ela cuminsa hopi aña pasa cu aguinaldo den Bicentenial di Noord, como tambe a forma parti di Campanitas Navideñas, Gaiteros del Norte, Maruba y ultimo den Katatumbo. Chonai a yuda varios organisacion manera grupo Flor di Bini Bini, Festival di Voz y Landia Escolar, gruponan di baile, Miss Teenage y Comision di santana di Noord. Chonai en general nunca e ta bisa “NO” na nada cu ser pidi na dje y apesar di tur su ocupacion semper ta sobra tempo pa su famia. Banda di musica e la dirigi y hunga softbal tambe pa Paxton y Montaña Braves den tempo di Gloria na e veld di Montaña.
Chonai awo ta disfrutando di su pension bon mereci, pero niun dia, e no por sinta keto. E stima bestia, mata y naturalesa pesey lo bo por mire den su cunucu ta planta diferente mata di fruta, boonchi, maishi y pampoena. Minister di Cultura Xiomara Maduro a entrega Sr. Isnardo Epifanio Faro den nomber di Gobierno di Aruba, un plakaat pa mas di 55 aña den su carera artistico como corista y musico.
Sr. Nelson Sprok
Un otro persona cu Gobierno di Aruba pa medio di Minister di Cultura a reconoce e anochi aki tabata Sr. Nelson Florencio Sprok, kende a nace dia 28 di oktober 1939 na Curaçao. Na un edad hopi jong ela bin residencia na Aruba y unabes aki, danki na Dios y cu hopi disciplina y perseverancia ela traha hopi duro pa yega na su metanan. Dia 30 di oktober 1967, Nelson a drenta enlace matrimonial cu Lucia Tromp. Recientemente nan a caba di cumpli 56 aña di bida matrimonial. Nan tin 4 yiu; Nelson, Jose, Khys y Luskys, 3 nieto, 2 nieta, 2 bisanieto y un bisanieta.
Door di hopi trabou y esfuerzo, Nelson a logra lanta su mes un compania conoci bao di e nomber: CONAR NV. Dia 14 di juli 1970, e compania a cumpli 53 aña di existencia dunando servicio na e comunidad di Aruba y a traha den varios proyecto grandi pa Aruba. Un trayectoria cu sigur a exigi hopi esfuerzo no solamente di Nelson pero tambe di su Sra. Lucia cu semper tabata para banda di Nelson. Na aña 1979, Nelson a cuminsa hunto cu su Sra. Mama cu benta di ijs, conoci pa su bon calidad. Nelson ta gusta agricultura y asina tabata planta berdura den gran cantidad y bende esakinan cu supermercado.
Nelson a dedica y coopera tambe hopi aña na Carnaval di Mucha na Noord. Dentro di e vision asina amplio, Nelson tabata tin un pasion pa nos musica di Aruba, nos folklor y a dicidi di rescata y yuda mantene nos musica tradicional bibo. Dia 14 di maart 1990, Nelson a a cumpra un Caha di Orgel. Ela a cuminsa train na cas y asina poco poco a cuminsa toca na diferente evento y actividadnan na e.o. cas di famia, pa gruponan di baile den nan shownan, pa actividad di nos grandinan di Huize Maristella, Paviljoen na Oranjestad y Verpleegtehuis na San Nicolas. Ademas di presenta na Misa, Misanan di Aurora, Bonbini Festival, yuda y educa nos muchanan cu tin Proyecto di scol cu informacion di nos música di Caha di Orgel. Asina nos por sigui menciona, Nelson a a bin ta promove cu hopi dedicacion y pasion, nos musica di Caha di Orgel.
Cu su caracter visionario, e ta dicidi di graba un CD, cu den su escencia ta constitui un prome paso pa preserva, dentro di tanto modernismo, nos musica pa e proximo generacionnan. E mandatário a sigui trece dilanti cu en breve por bisa cu definitivamente Nelson Sprok ta un “surprise box” yen di entusiasmo pa bida y pa sigui activo, poniendo sualma, bida y curazon den tur loke e ta haci.
Como Minister di Cultura den nomber di Gobierno a entrega un plakaat di reconocimento na Sr. Nelson Florencio Sprok pa mas di 30 aña dunando su aporte na nos musica di Caha di Orgel.
Gradicimento
Por ultimo Minister Maduro ta gradici un bes mas Sr. Chonai Faro y Sr. Nelson Sprok pa nan contribucion na mantene y promove nos cultura. Ademas ta gradici Fundacion Union di Tipiconan Rubiano, pa organisa Fiesta Tipico den Bario y asina sigui mantene nos cultura di musica tipico bibo pa asina nos por disfruta di dje den nos barionan hunto cu famia y conocirnan. Danki na tur grupo Tipico, tur musico y cantante pa nan presentacion den e Fiestanan Tipico den Bario, como tambe tur esnan cu ta presencia pa apoya loke ta di nos Aruba, nos cultura, pasobra “Cultura Bo tin cu Bib’e!.
