Featured Local Politica

E biento di neo-colonialismo nos lo no por cambia, pero si nos por ahusta e belanan di nos patria aruba pa salba e klompi diamante cu yama status aparte!


ORANJESTAD,Aruba

Segun Thomas S. Monson, un religioso Americano,“Nos no por cambia direccion di biento, pero si nos por ahusta nos belanan!” Esaki UPP ta kere pa Aruba tambe ta aplicabe, mirando nos situacion.

Desde fundacion di UPP na 2012 y mas ainda despues di 2014, na momento di e “welga di hamber” di e Prome Minister Mike Eman, nos a pidi atencion di nos politiconan, pero tambe otro gremionan, pa nos unifica nos mes aki na Aruba, pa asina den un Bloke Nacional, nos mustra gobierno Hulandes, cu nos mes lo regla nos asuntonan y  asina salbaguardia nos autonomia, den e caso aki financiero.

UPP consciente di e biento neo-colonial aki, a bin ta adverti pa esaki y a pidi pa bin cu un Dialogo Nacional y asina yega na un Compromiso Nacional. Pero tur e tempo nos politiconan, dota cu un grado di partidismo, fanatismo y ignorancia total a scohe e caminda pa sigui polarisa e pueblo y a scohe pa NO ahusta e belanan di e barco cu yama ARUBA, percurando pa e biento neo-colonial hiba nos na un entrega total. Esaki a bin ta sosode desde 2010, ora Mike Eman a scohe pa brasa tur cos cu Hulanda ta pone su dilanti y hasta a yega asina leu, di acepta cu nos por bay forma parti di leynan di Reino (Rijkswet) a base di consesus cu ta conta pa St. Maarten y Corsou.

Mike Eman y henter su partido di AVPOR a hiba e pais aki na rand di un desaster financiero, causa pa mal gobernacion, corupcion, patronahe politico, yenamento di gobierno cu mas trahado lantando diferente departamentonan nobo, gastamento sin misericordia di fondonan publico cu no tin cu proyectonan fatamorgana, compromiso cu proyectonan PPP cu tin e pueblo aki horca.

Pa colmo ora cu POREDmep a drenta den gobernacion 2017 hopi no a cambia. A sigui den mesun rumbo, apesar cu  a priminti di bay goberna drechi. Cada bes nos por mira cu ta yega na acuerdonan cu Hulanda, na unda nos ta perde cada bes un tiki, primitiendo Hulanda di bay goberna Aruba drechi.

Awor cu e biento neo-colonialista ta afectando nos, kier core trata na ahusta e belanan. Awor Prome Ministro Wever-Croes ta anuncia siman pasa cu lo bin cu un Cumbre Politico cu partidonan politico y tambe un Consulta Nacional cu e gremionan sindical y comercial. Esaki pasobra Hulanda lo Hulanda lo a menaza pa laga Aruba bira parti di e RTF y tambe cu lo bin un Entidad Nobo cu ta supervisa e placanan cu wordo presta na Aruba (tambe Corsou y St. Maarten). Awor nos ta tende cu lo kier bin splica e partidonan kico ta e situacion financiero di pais Aruba, y kico ta e diferencianan entre Caft y e RFT.

UPP a tuma nota di e noticia aki cu cierto reservanan. Di un banda nos ta apoya pa e tur gremio sinta cu otro y asina delibera riba e situacion y futuro di Aruba, pero di otro banda parce cu no tin un agenda, sino mas bien pa pasa dal un cofi cerca Prome Minister, y scucha con duro e ta trahando, pa djey por mustra cu el papia cu tur gremionan aki na Aruba.

Pa straño cu ta zona, te cu diadomingo atardi, ainda UPP no a haya ningun invitacion. Pues nos no sa kico ta e agenda, ni ki espacio ta duna pa nos discuti asuntonan esencial pa nos pais, manera e leynan di Bon Gobernacion, maneho di personal y financiero di pais Aruba, etc.

Mirando e base minimo cu gobierno di Aruba ta sostene riba dje UPP ta puntra cu si na e momentonan aki lo no ta miho bin cu un gabinete nacional y no-politico, mirando e tarea pisa pa pone Aruba riba track bek despues di COVID-19 y pa contra-aresta e biento neo-colonialista Hulandes aki. UPP no ta kere cu Aruba lo wordo sirbi cu un eleccion na e momentonan aki, pero si ta kere cu mester haci uzo di e tempo cu ta resta nos, pa ahusta belanan di e pais aki y asina salbaguardia e autonomia di pais. Nos ta consciente cu e situacion di Aruba na e momentonan aki ta hopi malo y cu kizas lo tin di negocia cu Hulanda. Negocia e duracion di e supervision, si esaki mester bin, pero tambe un entidad cu no ta Hulandes (p.e. IMF, Worldbank of otro instito internacional), pa evita cu nos ta keda na merced di gobierno Hulandes.

Pero e forma cu gobierno kier pasa e cleste aki di RTF y e entidad nobo, parce cu ya caba tin palabracionnan haci, ala Mike Eman, y na e momentonan aki ta e scenario mester wordo crea pa bende esaki na nos pueblo.

Si realmente gobierno y Prome Minister kier drecha e belanan di nos pais, anto mester bin un Cumbre Nacional, unda tur gremionan ta participa, y pa di e forma aki for di un dialogo habri y sincero, produci un Compromiso Nacional.  Cu fanatismo, manipulacion y polarizacion nos lo no sali for di e tempestad aki. Awor ta ora pa nos ta fanatico, pero di  PAIS ARUBA y di e ARUBIANO.

Related posts

Parlamentario Endy Croes: Historia di 45 aña di nos Himno y Bandera

EA News Author

Scirbi pa Pastor Marcel Balootje. NO PREOCUPA, NOS DIOS TA FIEL.

EA News Author

Heart-Centered Leadership Foundation ta refleha riba un aña impactante

EA News Author

Leave a Comment