Tourism Corporation Bonaire (TCB) ta orguyoso di por mantené su tradishon di hopi tempu kaba, kaminda pa medio di e Programa di Bonaire Friends ta honra hendenan ku a duna un kontribushon supstansial na Boneiru su sektor turístiko. E inisiativa akí ta un homenahe na personanan ku konsistentemente a duna muestra di un dedikashon eksepshonal i un personalidat kaluroso i hospitalario, ku ta enrikesé e eksperensia general di nos bishitantenan.
Ku hopi plaser nos ta laga boso sera konosí ku algun persona remarkabel ku resientemente a subi nos lista di Bonaire Friends:
Esperanza Sanches – 1 di desèmber 2023
Esperanza, kende ya pa mas ku 29 aña kaba ta biba na Boneiru, ta representá e amabilidat i afekto di habitantenan di Boneiru. Su servisio atento na Sunset Restaurant i su konsehonan tokante nos isla ta engrandesé eksperensia di nos wéspetnan enormemente. Su ekspertisio i su aktitut hospitalario ta laga un impreshon permanente atras serka nos bishitantenan.
Israël Gil – 8 di desèmber 2023
Israël su talento komo trahadó di pelíkula i fotógrafo i su pashon pa mustra Boneiru su maravianan natural, tantu riba komo bou di superfisie di laman, ta realmente remarkabel. Su disponibilidat pa kompartí e prendanan skondí di nos isla, tantu riba tera komo bou di laman, ta añadí un dósis èkstra di eksitashon na biahe di kada bishitante.
Artie de Vries – 15 di desèmber 2023
E dedikashon sin ningun klase di interes propio di señor Artie na vários aktividat boluntario, entre otro konservashon di nos palunan di mangel, yudansa pa hende den nesesidat, limpiamentu di kosta, konservashon di monumento i mas, ta mustra su dedikashon na bienestar di Boneiru i nos bishitantenan ta ripará esaki. Su kontribushonnan multifasétiko tin un impakto grandi riba e komunidat di nos isla.
Rick Aguilar – 22 di desèmber 2023
Rick ta un defensor firme pa konservashon di e sistemanan vulnerabel di ref na Boneiru. Su kompromiso insesante pa konservashon di e sitionan di buseo di nos isla realmente meresé hopi elogio. Su esfuersonan ta haña oido serka kolega sambuyadónan i amantenan di laman na California, loke ta fortifiká e importansia di protekshon di e tesoronan natural akí.
Alberto – 29 di desèmber 2023
Alberto su amabilidat a bini bon kla dilanti na momento ku el a hasi tur loke tabata na su alkanse pa yuda un bishitante ku a sera su yabinan den baul di su outo di hür. Su disponibilidat pa regla transporte pa bai buska un yabi di reserva i pa ofresé sosten kontinuo, ta un ehèmpel di e berdadero sentido di komunidat ku por topa kuné na Boneiru.
E hendenan akí, huntu ku otronan, ta forma e kurason di e Programa di Bonaire Friends i ta representá Boneiru su karakter amabel i humano.
Aparte di selebrá e personanan ku ta destaká akí, nos ta invitá nos bishitantenan pa kompartí nan propio storianan remarkabel ku nos komunidat lokal riba e página spesial di Bonaire Friends riba https://bonaireisland.com/bonaire-friends. Tourism Corporation Bonaire ta ekspresá su mas sinsero apresio pa tur e habitantenan fantástiko di nos isla pa nan kaluroso hospitalidat i nan dedikashon insesante na éksito di nos sektor turístiko. Nos ta invitá tur hende pa huntu ku nos honra e lasonan spesial i e amistatnan pa bida largu ku a sera na Boneiru.
