PoliticaLocalUncategorized

Ex-Prome Minister Nelson Oduber: Awe 13 di juli ta recorda cu 30 aña pasa mi a firma pa kita e fecha di Independencia 1996 for di den Statuut

Schrap Independencia 1996

ORANJESTAD,Aruba

Despues cu nos pueblo a lucha desde decadanan 40 pa Separacion di Antias, unda hasta 2147 Arubiano a firma pa esaki, tabata porfin na maart 1983 nos a bin logra na e Conferencia di Mesa Rondo na Den Haag, Hulanda cu entrante 1 di januari 1986 den fase transitorio nos lo por a sali for di e constelacion Antiano di desigualdad di e 12-8. Tambe cu 1 di januari 1996 nos lo mester bira independiente den un Man Comunidad Sui Generis, esta den Man Comunidad cu Hulanda. Hulanda a pone cu e 10 añanan di e fase transitorio lo bin cu un cooperacion estrecho cu e gobierno di Antias di 5 y cu nos lo paga un promedio di mas cu 10 miyon florin pa aña den un fondo di solidaridad pa e islanan mas chikito. Hulanda den e 33 conclusionnan di Mesa Rondo di maart 1983 a priminti nos garantisando pa por bira independiente na 1996. Logicamente e defensa, relacionnan di exterior, Corte Comun di Casacion na Hulanda, cooperacion cu otro riba varios otro tereno di educacion, salubridad publico etc.

Coalicion di 4 partido politico (1986)

Lamentablemente partido MEP a perde su mayoria den e eleccion yama adelanta dia 22 di november 1985, unda MEP a perde nada menos cu 5 asiento como danki pa a realisa e anhelo di e Arubianonan apesar cu Betico Croes mes tabata haya mas voto individual cu tur politico. A ser forma dia 20 di december 1985 un gobierno di coalicion di nada menos 4 partido politico, unda e partidonan cu a forma e Bestuurscollege di e tempo ey pa goberna na entrada di Status Aparte

1 jan. 1986 no a ni invita MEP pa papia corda pa goberna den un coalicion. Aki tambe 31 di december 1985 e ola di persecucion politico hamas bisto den politica a cuminsa, unda ni Betico Croes ni Nel Oduber y hopi otro no a scapa.

Dia 1 di januari 1986 nos como pais Aruba a inicia cu un gobierno di coalicion di 4 partido unda no tabatin e decencia pa invita esunnan cu tabata Coordinador pa prepara Status Aparte pa por a presencia e momento historico aki. Como comparacion, dia Corsou a drenta su Status Aparte dia 10 di oktober 2010 mi tabata invitado di nan gobierno pa presencia e momento historico ey y cu mi a bay cu mi señora hunto cu Glenson y Angie.

 

1986-1988: No a haci nada riba tereno estatal

E gobierno cu a sinta dia 1 di januari 1986 – fuera di persecucion politico na un forma hamas bisto – no a haci nada nada na ehecuta e contenido di e resultado di e 33 puntonan di conclusion di e Conferencia di Mesa Rondo di maart 1983. Danki Dios y nos pueblo – despues cu mi a bira lider di MEP de facto na fin di 1985 y oficialmente dia 8 maart 1987 – nos a bin gana landslide e eleccion di 6 di januari 1989 unda pa falta di apenas 24 voto nos lo a saca 11 asiento cu ta e mayoria absoluto. Ora nos a drenta na 1989 – fuera di e problemanan gigantesco di e garantianan cu Mafia Italiano y local – nos mester a cuminsa ehecuta e resultadonan di e Conferencia di Mesa Rondo. Nos a ripara cu tabata imposibel pa fia placa den exterior pa cualkier proyecto sin cu inversionistanan tabata pidi, mescos cu e proyectonan pa e 3 hotelnan na 1986-1989, garantia di gobierno pa e prestamonan.

1989: Buscando e claridad necesario

Nos a bisa mirando e mal experencianan di pasado nos gobierno no ta duna ningun garantia mas.

Mi ta corda con Hulanda mes a participa na nos cu nan lo no inverti mas den defensa ni den e kazerne na Savaneta. Nan Pensioenfonds a nenga di fia FCCA placa y e Haponesnan envolvi den e proyecto di Hyatt kier a hala atras si no bin claridad kico ta bay para na 1996.

Mi a bay cerca mi miho consehero cu ta awe den feliz memoria Apolonio (Poy) Werleman y mi a contele e situacion aki y nos a conclui cu mester bay exigi Hulanda pa nan traha ariba e garantianan cu nan a priminti nos pa por bira independiente na 1996. Mi a bay discuti esaki cu nos Parlamento 1989-1990, unda unanimamente nan a duna mi e mandato pa bay negocia cu Hulanda y pa bay busca e claridad necesario.

 

Hulanda no a cumpli cu e Garantianan di RTC

Mi a bay Hulanda na mei 1989 hunto cu mi colega ministro awe den feliz memoria Guillermo Trinidad, un bon consehero, y na Hulanda nos Ministro Plenipotenciario ing. Roland Lacle dfm, un bon amigo, a compaña nos pa reuni cu lider di tur fraccion den Parlamento Hulandes pa lobby cerca nan cu Hulanda mester cumpli cu e promesa di duna nos e garantianan necesario pa por bira independiente.

Nos a bay negocia cu Prome Minister Ruud Lubbers dfm y e minister encarga cu nos asuntonan, mr. Ernst Hirsch Ballin. Gobierno Hulandes no kier a duna nos e garantianan manera priminti na RTC maart 1983 y hasta a bisa cu e 33 puntonan di conclusion di RTC ta “los verbonden met elkaar”. Cu otro palabra, ta independiente nos mester bira na 1996 sin garantia.  E ora mi a bisa nan cu sin e garantianan priminti nos lo no bira independiente na 1996 y mester schrap e fecha pa duna nos mas tempo. No tabata un proceso y discusion facil pa yega na un acuerdo cu gobierno Hulandes y pa yega na un protocol cu ta kita e fecha di independencia for di den Statuut. No lubida cu Hulanda a ancra den Statuut e tempo ey cu e “rechtsorde” Status Aparte, ta caba na 1996 y 1 di januari 1996 nos ta for di Reino Hulandes.

Firmamento pa saca e fecha di Independencia

Despues di hopi lobbymento y discusion mi a logra den nomber di nos gobierno pa firma dia 13 di juli 1990 cu Gobierno Hulandes cu pa trece claridad, seguridad y trankilidad, ta saca e fecha 1996 for di den Statuut y Aruba ta regla/palabra cu Hulanda cu nos ta mantene si e derecho di autodeterminacion, cu nos por bira un dia independiente – contrario manera Surnam – pero aki lo mester tene un referendum cu mester haya un mayoria di pueblo y alabes mester di un sosten di 2/3 parti di Parlamento. Independencia mester bay na un forma responsabel, organisa y ordena. No por haci wega cu algo serio asina. E tempo ey AVP a core declara cu nos no a logra nada na Hulanda. Aki na Aruba mes tabatin un grupo den MEP cu no tabata di acuerdo. Como lider e tempo ey mi a organisa un Congreso na Bushiri Hotel pa splica e protocol y busca sosten. E tempo ey Glenbert y Junior Croes, yiunan di nos estadista Betico Croes, a bin duna nan sosten na e acuerdo cu al final a ser aproba pa nos lidernan di bario.

E acuerdo di 13 di juli 1990 a trece cune cu nos por a termina construccion di Hyatt Hotel, e reapertura di e refineria, nos por a haya placa pa FCCA. Alabes Hulanda a inverti masha hopi placa den Marinierskazerne, hasta a construi casnan na Bushiri, Buena Vista, Parkietenbos pa e mariniernan.

Brede draagvlak den Parlamento

Ora Tweede Kamer mester a vota pa e ley pa cambia e Statuut pa saca e fecha di Independencia a bin problema entre Gobierno Lubbers y un par di e miembronan. Hirsch Ballin a yama mi na telefoon bisando mi cu Tweede Kamer kier pone condicionnan pa por vota pa saca e fecha di Independencia 1996  for di den Statuut y cu nan kier pa nos tin un “brede draagvlak” den Parlamento. E tempo ey na 1993 nos tabatin un mayoria minimo den un coalicion di 9-1-1 cu ta net 11 asiento. Lubbers y Hirsch Ballin a pidi mi pa ami como Minister President di Aruba y mr. Henny Eman, lider di AVP den oposicion na oktober 1993 bin Hulanda pa discuti.

P’ami sacamento di e fecha di 1996 for di den Statuut tabata mas importante cu nos interes politico y partidario. Na Hulanda ami cu Henny Eman a firma un protocol cu a habri e porta pa Tweede Kamer por a vota pa cambia Statuut sacando e fecha di 1996 pero lagando si nos cu e derecho manera poni den e cambio di Statuut cu dia nos kier bira Independiente, ta djis tene un Referendum y haya sosten di 2/3 parti den Parlamento.

Otro logro grandi riba tereno estatal

P’ami – fuera di tabata e diputado encarga cu tur preparacion pa awe nos tin nos himno, bandera, ortografia, referendum, coordinador pa prepara nos Status Aparte – laga saca e fecha di independencia for di den Statuut ta un di e logronan mas grandi riba tereno di structura estatal cu mester ser skirbi como legacy, pa nos historia no ser bruha cu cosnan cu no ta refleha e realidad politico.

Awe cu nos ta recorda 30 aña di e momento historico aki, mi kier a gradici mi señora Glenda, mi 3 yiunan Glenson, Dangui y Nelson Jr,, partido MEP cu tabata e vehiculo, tur cu a vota pa mi den tur tempo, votadornan cu su directivanan, lidernan di bario, militancia, partidonan PPA y ADN cu tabata cu mi desde 1989 pa 1994 den coalicion, danki na boso tur cu a yuda pa scapa Aruba di bira independiente na 1996. Esaki ta algo grandi y historico cu un balor mucho mas aya y cu lo mester ser recorda. Tabata un honor cu boso sosten pa por a dirigi MEP 25 aña largo y por a conserva y proteha nos Status Aparte cu desde entrada di CAFT na 2015 a keda na filingrana.

Related posts

Entrante dialuna awor Departamento di Impuesto ta extende su orario di servicio di caha na Camacuri

EA News Author

Gran musico Arubiano ta wordo honra pa su legado musical laga atras pa nos: CAYA HILDWARD CROES

EA News Author

Minister Geoffrey Wever: Stakeholders a ricibi presentacion riba e impacto economico di Vacation Home Rentals na Aruba

EA News Author

Leave a Comment

Whatsapp Message