E miembronan di e federacion ‘Dutch Caribbean Mental Health’ (DCMH) a reuni na Boneiro for di 8 te cu 11 di juni 2026. Durante e bishita di trabou aki intercambio di conocemento, colaboracion regional y e resultadonan preliminar di e segundo edicion di e Estudio Regional di Salud Mental pa e area di Caribe 2025 tabata central. Tambe a entrega e informe di e investigacion ‘GGz Carib’ na e miembronan di DCMH.
Fortalece colaboracion den region
DCMH ta consisti di FSMA Respaldo na Aruba, GGz Curaçao, Verslavingskliniek Brasami na Corsou, PSI Skuchami na Corsou, Mental Health Foundation na Sint Maarten y Mental Health Caribbean (MHC) na Boneiro, Sint Eustatius y Saba. Durante e bishita di trabou e representantenan di e diferente institucionnan di salud mental di e islanan a haya un recorido di varios departamento di MHC.
Durante un reunion cu a tuma lugar dia 9 di juni 2026 a presenta y discuti e resultadonan preliminar di e Estudio Regional di Salud Mental pa e area di Caribe 2025. E informe aki ta duna un bista estadistico general di e cantidad di clientenan den e sector di salud mental riba e islanan y di nan problemanan principal psicologico. E miembronan di DCMH a duna feedback riba e resultadonan y a dialoga con por fortalece y garantisa e colaboracion regional na momento di colecta datonan.
Durante e reunion aki tambe a entrega e informe ‘GGz Carib’ di ‘Curaçao Biomedical and Health Research Institute’ (CBHRI) na e miembronan di DCMH. E investigacion aki ta brinda informacion valioso tocante e panorama di cuido den salud mental na Corsou y Boneiro. Ademas DCMH a ofrece un presentacion y tayer durante e conferencia di cuido di ‘Zorg en Jeugd Caribisch Nederland’ (ZJCN).
Estudio Regional Salud Mental area di Caribe
Pa di dos biaha consecutivo, DCMH ta brinda un bista di e salud mental di e seis islanan di Caribe den Reino Hulandes hunto den un solo perspectiva. Durante e conferencia di cuido di ZJCN, a comparti un prome bista riba e resultadonan di e Estudio Regional di Salud Mental den e area di Caribe 2025.
Pa compila informacion di e region en general, a recolecta dato di casi 10.930 cliente, reparti riba seis isla. E resultadonan ta mustra entre otro, cua condicionnan y problematicanan psicologico ta presenta mas frecuente den e cuido di salud mental den e region.
E condicionnan psicotico ta esun di mas comun. Esakinan ta condicionnan unda hende por tin dificultad pa distingui realidad di pensamento. Por ehempel, nan por sufri di delirio of halucinacionnan. Despues di esaki ta sigui e trastornonan di desaroyo neurobiologico, manera ‘Attention Deficit Hyperactivity Disorder’ (ADHD) y autismo. E trastornonan aki hopi biaha ta visibel for di mucha y ta relaciona cu e forma con e celebro ta desaroya.
Na di tres lugar tin problematica psicosocial, manera stress causa pa problema financiero, dificultadnan den cas of tensionnan den famia.
E estudio regional ta yuda e institucionnan di salud mental pa colabora miho cu otro y adapta e cuido mas hopi posibel na e necesidad di e persona.
Colaboracion como condicion pa cuido di calidad
Durante e conferencia di cuido di ZJCN, Caroline Hart di Respaldo y Kathelijne van den Boogert di MHC a presenta na nomber di DCMH loke e federacion a logra den e ultimo añanan. E mensahe central tabata:
“Colaboracion riba e islanan no ta un opcion, sino un condicion indispensabel pa por brinda cuido di calidad.”
Ademas, DCMH a duna un tayer tocante e compilacion di data den region. Durante e seccion aki, a discuti con a logra pa reuni data for di diferente sistema riba e diferente islanan y unda tin oportunidadnan pa mehora e calidad di e datonan y e continuacion pa monitor den region.
Cu e bista di e estudio regional conhunto, DCMH ta duna un paso importante den haci e necesidadnan di cuido den e region mas visibel. Door di conecta conocemento, cifranan y experiencia e institucionnan di salud mental den e parti di Caribe di Reino Hulandes por sigui traha hunto pa un cuido di salud mental adecua, accesibel y prepara pa futuro.
