Presidente di fundacion Venearuba, Ghislinne Henriques, a lansa un yamada urgente na e comunidad di Aruba pa enfoca nan donacionnan riba remedi, cuminda den bleki y articulonan di prome necesidad pa yuda e victimanan di e desaster reciente na Venezuela, pidiendo pa stop un rato cu e entrega di paña.
E fundacion, den cooperacion estrecho cu e organisacion Odres Nuevos, ta trahando incansablemente pa recopila y clasifica e yudansa cu ta biniendo di parti di comunidad. Sinembargo, Henriques a splica cu e situacion actual ta rekeri un cambio di prioridad.
Remedi y articulonan pa baby ta e urgencia maximo
Henriques a enfatisa cu tin un necesidad enorme pa material medico y di higiena pa motibo di e situacion dificil cu e areanan afecta (manera Estado Falcón, Tucacas, Morón y Puerto Cabello) ta pasando aden.
E articulonan mas selecta na e momentonan aki ta:
*Medicina: Analgesico, antipiretico, crema pa dolor y antibiotico.
*Articulonan di higiena: Patches pa herida, tape, alcohol, desinfectante y tapa boca (esencial pa e rescatistanan debi na e riesgo di salubridad publico).
*Flashlights / Luz di man: Hopi necesario pa e buskedanan y pa e personanan cu a keda sin coriente.
*Pa baby y adulto: Pampers, cuminda di baby, formulas, y pampers pa adulto.
*Cuminda y awa: Cuminda den bleki y hopi awa di bebe.
Un di e puntonan mas critico cu e presidente di Venearuba a trece dilanti ta e cantidad grandi di paña cu nan a ricibi, di cual hopi no ta den bon estado.
Nos tin cu bisa cu, lamentablemente, gran parti di e pañanan cu ta yega ta daña, paña di fiesta, zapato di hilchi, of paña di carnaval. Nos ta pidi hende pa pone man na curason: duna loke abo mes lo kier ricibi si bo tabata den necesidad,” Henriques a declara.
E fundacion a dicidi di stop cu e recepcion di paña pa asina por procesa loke nan tin caba y evita gasto innecesario di combustibel, transport y tempo di e boluntarionan, kendenan tin cu tira afo loke no ta sirbi.
Logistica y e ruta di yudansa
Pa loke ta trata e cifranan di daño y victimanan, Henriques a declara cu maske cifranan oficial ta varia, tin reportenan inoficial cu ta papia di mas di 1,400 persona cu a fayece y rond di 50,000 persona desapareci.
E logistica pa hiba e yudansa no ta facil pa via di e tantisimo limitacionnan, pero Venearuba tin aliansanan strategico pa garantisa cu e donacionnan ta yega via barco na e mannan correcto na Venezuela de forma safe. E barconan lo ta saliendo super trempan for di e waf
Con pa yuda?
E fundacion ta ricibiendo e donacionnan na nan sede situa banda di Visser traiding , patras di Crown, unda un blaas grandi ta sirbi como referencia. Nan lo ta habri dialuna te cu 8:00 PM.
Finalmente, e fundacion ta haci un yamada special na e comerciantenan local pa aporta cu maske ta un bleki of un boter di awa, y na personanan cu tin pickup of truck pa yuda transporta e materialnan pa e waf.
