Gobièrnu di Kòrsou a anunsiá ofisialmente inisio di e trayekto pa remplasá e eskudo aktual di Kòrsou pa un emblema nobo. Esaki pa fortalesé nos outonomia i dal stapnan ku fe den direkshon di un époka nobo pa Kòrsou. E emblema mester uni nos komo pueblo, representando tur loke ta importante pa nos desaroyo propio. Esaki lo sosodé konhuntamente ku pueblo di Kòrsou.
A traves di un trayekto partisipativo, esta un kompetensia, pueblo di Kòrsou ta bai haña oportunidat pa entregá nan mes diseño i alabes skohe nan emblema preferí. Un komishon, ku ta konsistí di ekspertonan riba e área di kultura, diseño i historia, lo hasi un selekshon for di e diseñonan mas skohí pa pueblo i finalmente saka esun ganadó a base di kriterianan stipulá.
Un emblema nobo ta forma parti di e trayekto tan importante di edifikashon di nos pais, kual ta trata e unifikashon di nos sosiedat diverso a base di norma i balornan ku nos ta identifiká nos mes kuné.
1 comment