Guizza Maria Steenvoorde, e reinante actual di Miss Teen Universe International 2025, eligi den representación di Aruba, ta cla pa subi riba tarima di Art Fashion pa prome biaha den un rol diferente: como diseñadora aspirante. Den un colaboración inspira cu e diseñador renombra di Aruba, Andrew Steba, Guizza Maria ta trece su diseño, cu no solamente ta moda, sino ta un mensahe profundo.
E edición di 2025 di Art Fashion tin un tema poderoso: JUSTICE.
Guizza Maria a eligi pa duna bida na un acto titula “Justice for the Child”, un presentashon cargá di emosión y pasion. E ta bai usa un poema cu su mes a skirbi, cu lo bira un show completo di palabra y moda.
Den un coreografía inolvidabel, Guizza lo subi tarima huntu cu seis celebridadnan hoben di Aruba: Elise Heronimo, Alina Wever, Savanah de Lisle, Shanedy Croes, Carolyn Kock y Christalyne Kock.
Hunto, nan lo trece atenshon na un di e temanan vital: E derecho di tur mucha riba mundu. Den e show aki, moda ta bira voz, Caminata ta bira protesta, y poesia ta bira un grito pa HUSTICIA. “BO NO TA BO SO”.
“Cada mucha merece protección, amor y respet. A través di e show aki, mi deseo ta pa laga tur hende sinti cu nos ta tin un RESPONSABILIDAD pa yuda crea un mundu mas justo pa nan,” Guizza Maria ta relata cu emoción. Mi kier mustra cu mi reinado no ta un corona, e ta cada ocashon cu mi por laga cada mucha sinti c unan valor ta insuperable”.
Tur esaki ta posibel gracia na e apoyo inmenso di L’Oréal International pa medio di Romar Trading, cu ta sigui invertí den talento hoben y creatividad Arubiano.
Art Fashion 2025 ta prométe pa keda den memoria como un evento cu ta bai mas allá di pasarela – un experiencia di arte, inspirashon y lucha pa HUSTICIA! Danki Tia Chastity Kock pa e sosten!
Bo no por faya e momentu úniko aki. Diarazon 3 di September nos ta uni pa laga cada mucha sa, BO NO TA BO SO!
