Ademas di debate riba HOFA, un otro tema cu a haya atencion durante e reunion di Interparlementair Koninkrijksoverleg (IPKO) ta cuestion di integridad den funcion publico, particularmente na nivel ministerial.
Lider di fraccion di MEP, Evelyn Wever-Croes, a pone comparacion cu un caso reciente na Hulanda, unda un parlamentario a presenta su renuncia despues cu a wordo descubri cu informacion riba su CV no tabata corecto. Segun Wever-Croes, e accion di retira boluntariamente a mustra sentido di responsabilidad, honor y seriedad den funcion publico.
Caso Minister Gerlien Croes ta causa preocupacion
Den contraste, MEP a pone enfasis riba situacion cu ta envolvi ministra Gerlien Croes. Segun Wever-Croes, Croes no a duna claridad tocante alegacion nan cu ta existi riba su actuacion, ni a presenta prueba publico pa sostene su posicion.
MEP ta argumenta cu minister a wordo invita varios biaha na Parlamento pa duna splicacion, pero cu, segun MEP, fraccionnan di AVP y FUTURO ta proteha e minister, limitando su presencia den parlamento di Aruba. Pa Wever-Croes, e situacion ta representa un señal negativo pa cultura politico di Aruba.
“Integridad ta stop na frontera?” e lider di MEP a cuestiona, insinuando cu standard cu ta aplica na Hulanda no ta wordo refleha mescos na Aruba. Segun Wever Croes , delegacionnan di Corsou, Sint Maarten y Hulanda a mustra sorpresa riba e postura di e minister Gerlien Croes y e falta di claridad publico.
IPKO: di temanan dificil pa discusion superficial?
Ademas di e tema di integridad, presidente di Parlamento di Sint Maarten, Sarah Wescot-Williams, a trece un critica mas amplio riba rumbo di IPKO. Segun Williams , IPKO a cuminsa originalmente como un plataforma pa trata temanan dificil entre paisnan ,manera autonomia, democracia, deficit democratico y mecanismo di resolucion di disputa ,pero cu poco a poco e enfoke a bira mas prudente y menos confrontativo.
E presidente a propone pa bolbe pone enfasis riba e asunto structura cu ta toca fundacion di relacion den Reino. Fraccion di MEP a expresa apoyo pa e posicion aki, señalando cu solamente door di enfrenta temanan compleho cu frankesa lo por logra progreso real.
Contacto y cooperacion como meta central
A pesar di tensionnan politico, meta principal di IPKO ta sigui fortalece contacto interparlamentario pa hunto aborda reto comun cu cada Pais tin. Sinembargo, debate reciente ta mustra cu cooperacion den Reino no ta exclui confrontacion di asunto di principio, manera integridad publico y autonomia institucional.
Cu e declaracionnan aki, MEP ta pone presion pa un debate mas profundo, tanto den Aruba como den marco di Reino, tocante standard di gobernacion y responsabilidad politico cu actualmente e gobierno di AVP-FUITURO ta laga hopi di desea.