E ròl di ‘kambio di komportashon den futuro maneho di resiklahe’ tabata
sentral durante un interkambio riba nivel tékniko resién ku SER di Kòrsou. Den e kuadro aki, Myrthe
George-Verhulst a presentá su investigashon i programa “Resiklahe di plèstik na Kòrsou – Di problema di
desecho pa un solushon di komportashon”.
Den su presentashon, George-Verhulst a mustra e urgensia di e situashon: ta kalkulá ku e landfill lo yega
na su kapasidat máksimo denter di sinku pa ocho aña, miéntras e volúmen di desecho ta sigui ekspandé
pa motibu di kresementu di poblashon, konsumo i turismo. Na mes momentu, solamente un parti limitá di
plèstik ta keda resiklá di berdat.
Pa SER, e problemátika aki ta forma un punto importante den su ròl mas ámplio di duna asesoria riba
tópikonan di desaroyo sostenibel, kalidat di bida i resistensia ekonómiko di Kòrsou.
George-Verhulst a enfatisá ku e núkleo di e problema no ta prinsipalmente falta di un infrastruktura, sino
falta di un komportashon struktural. Na 2026, kapasidat di resiklahe lo ampliá di shete pa diesdos sentro
di resiklahe. Sinembargo, sin kambio di komportashon dirigí, e ampliashon aki no lo trese un oumento
sustansial den resiklahe outomátikamente.
E programa presentá ta basá riba investigashon di siensia di komportashon, inkluso un análisis ACDR
(Architecture, Competence, Drivers, Resistances) di Behavior Change Group, opservashonnan na
sentronan di resiklahe i un enkuesta kuantitativo bou di habitantenan di Kòrsou. E konklushon ta kla: hopi
hende ke resiklá, pero nan ta eksperensiá demasiado bareranan práktiko, falta di klaridat, falta di rutina i
insufisiente konfiansa den e sistema.
E programa ta tradusí e perspektivanan aki den un ekosistema integrá di komportashon ku 65
intervenshon konkreto, strukturá riba sinku pilár: hasi resiklahe sumamente fásil; kita duda; hasi resiklahe
un rutina diario; stimulá orguyo i identidat; i fortalesé konfiansa den e sistema pa medio di transparensia.
Pa SER, e tema aki no ta solamente unu ambiental, sino ta toka varios tópiko den ámbito di maneho
sosio-ekonómiko den kua e Konseho tin un responsabilidat di asesoría. E problema di desecho ta
influensiá kalidat di bida den bario, atrakshon turístiko dje isla, kompromisonan internashonal di
sostenibilidat i reputashon di Kòrsou komo lokalidat pa invertí i establesé. Ademas, implementashon ta
rekerí koperashon públiko i privá, ko-finansiamentu i sosten institushonal — temanan ku ta konektá
direktamente ku e ròl di asesoría di e SER.
George-Verhulst a hasi un yamada pa responsabilidat kompartí i koperashon struktural entre gobièrnu,
sektor privá, organisashonnan sosial i institushonnan di edukashon pa hasi resiklahe e norma sosial
nobo na Kòrsou.
“E pregunta no ta si nos mester aktua,” segun George-Verhulst, “sino kon leu nos komo komunidat ta
dispuesto pa realisá e resiklahe di forma sostenibel.”
SER ta enfatisá ku perspektivanan di investigashonnan manera esaki ta duna un aporte balioso pa
konsehonan futuro enkuanto polítika di desecho i intervenshon di komportashon, kaminda diálogo sosial i
koperashon entre sektornan públiko i privá ta esensial.