Direktorado di Supervishon i Mantenshon, Stinapa i Selibon ta tene kontrol severo durante fin di siman di Pasku Grandi na lugá di kamper kantu di laman. E aña akí ta permití pa kamper di 2 di aprel te ku 14 di aprel. E tres organisashonnan ku ta supervisá, ta atvertí tur hende pa tene nan mes na e reglanan vigente.
Temporada pa kamper
For di 2 di aprel 2023 te ku 14 di aprel 2023 ta permití pa kamper. For di 1 di aprel 2023 numa ta permití pa poderá di un lugá. Ta kita tur lugá ku hende a poderá di dje promé ku e tempu akí.
Evitá uso di pèlet
E tres organisashonnan ta pidi hende ku ta kamper pa nan usa ménos pèlet posibel i ta rekomendá pa e motibu ei pa usa tènt. Un tènt ta keda mas nèchi i ta formá ménos opstákulo pa otro usuario di playa i pa turista.
Rùim òp
For di 15 di te ku 17 di aprel abo komo hende ku ta kamper, tin chèns pa rùim òp tur kos i benta nan afó. Esaki ta nifiká ku bo tin ku bai bèk ku tur kos ku bo a bini kuné. Tene kuenta ku surtido di kliko.
Karta ku regla
E tres organisashonnan menshoná aki riba, lo pasa serka hende ku ta kamper ku un karta ku regla ku nan mester tene nan mes na dje. Mester firma pa entrega di e karta, esaki ta enserá tambe ku e usuarionan ta asumí responsabilidat pa nan tereno di kamper.
Tur kaminda ku hende ta kamper na laman e reglanan ta lo siguiente:
- No tira ròmel na suela òf den laman, usa kliko;
- No kima karbon den santu, pero usa un BBQ;
- Benta karbon usá den e baki spesial pa kos ku a kima. (no den laman òf den kliko);
- Ta prohibí pa toka muzik entre 03:00 or di mardugá i 06:00 or di mainta;
- Pa Sorobon tin un prohibishon total pa toka muzik pa evitá molèster pa bestia. Esaki ta un área di RAMSAR;
- Kachó no por ta na playa;
- Vehíkulo no tin mag di ta riba playa;
- Nada di konstrukshon riba playa, hasi uso di tènt;
- No por hasi renobashon na edifisio eksistente, hasi uso di tènt;
- Ta prohibí pa kamper na Klein Bonaire;
- Ta prohibí pa piska gutu, kref i karkó.
