Local

Leerorkest Aruba ta sigui enrikese bida di alumnonan cu musica.


ORANJESTAD, Aruba

For di momento cu a inicia cu lesnan di musica na september 2019, Fundacion Leerorkest Aruba a realisa con hopi muchanan di Aruba tabata cla pa un proyecto asina. A cuminza cu lesnan di algemene muzikale vorming (formacion general di musica), bou guia di Mayra Kock-Garrido, Tica Giel, Jane Lanooij y Jaderick Croes.

Pero awor danki na docentenan di musica cu a uni na e proyecto piloto, financia pa Ministerio di Husticia di Hulanda bou auspicio di Leerorkest Nederland, a amplia e programa cu lesnan di introduccion di instrumento. Particularmente a introduci e instrumentonan fio, trumpet y clarinet.

E luna aki ya caba a introduci muchanan di klas 2 y 3 di e scolnan cu ta participa na e instrumentonan menciona. Y na Maart nan lo haya les pa siña toca e instrumentonan aki. Docentenan Hester Mattijsse, Roderick Albus, Lazaro Barizonte lo duna e muchanan e oportunidad pa siña toca fio, trompet y clarinet respectivamente, mientras cu docente Mayra Kock-Garrido y su colega Jaderick Croes lo continua cu nan les di canto.

Rose Marie Provence di Muchila Creativo ta encarga cu preparacion di e lesnan di musica, cu ta ilustrativo di e colaboracion cu Leerorkest Aruba ta boga p’e. Di e forma aki kier ancra e fundeshi di musica den scol basico na Aruba pa asina brinda muchanan e oportunidad pa no solamente siña mas di musica, pero tambe pa desaroya abilidadnan creativo y comunicativo.

Tur e muchanan cu ta participando den e proyecto piloto di Leerorkest Aruba lo duna un presentacion di locual nan a siña, sea ta den tocamento, canto of ambos durante un presentacion bunita pa nan famia, y publico dia 28 di Juni, na Centro Deportivo Betico Croes (Sporthal), Santa Cruz. Como 200 mucha lo presenta riba e dia ey. Lo tin mas informacion riba e horario despues.

Fin di luna, esta dianan 28, 29 di Februari y Maart 1, e docentenan cu ta participa cu e proyecto di Leerorkest Aruba lo uni cu nan coleganan di Leerorkest Curaçao y Leerorkest Bonaire pa un tayer intenso bou encargo di Leerorkest Amsterdam. Docentenan di Hulanda lo comparti nan conocemento y experiencia, pa asina yuda e diferente islanan den nan afan pa contribui na desaroyo di tur mucha. 

Hopi scol a mustra interes pa e programa di LeerOrkest. E ta nifica cu e fundacion na Aruba mester cuminza traha riba su fondonan propio pa continua y amplia e programa pa asina mas alumno di nos isla haya e mesun oportunidad aki. E intencion ta pa cuminza cu un curso na IPA, cuminzando na Augustus venidero, pa forma mas docente di musica pa asina por amplia e oferta di conocemento.

Di e forma aki, LeerOrkest Aruba a mustra cu a ranca sali cu hopi animo y cu tur intencion pa sigura cu tur alumno di scol basico na Aruba pronto lo por probecha di e rikesa cu musica ta representa, cu ta sosten emocional y creativo pa promove e potencial di cada uno. 

Pa mas informacion bishita nos pagina web leerorkestaruba.org of sigui nos riba e pagina di Facebook Leerorkest Aruba.

Potretnan ta di docentenan Mattijsse, Albus y Barizonte, durante e lesnan di introduccion di nan instrumentonan.

Related posts

Gobierno di Aruba ta prepara pa e situacion di COVID19 pero abo mes mester duna di bo parti y cuida

EA News Author

Retiro di Marisol Lopez-Tromp a bay segun regla

EA News Author

Education USA Aruba ta celebra nan prome aniversario

EA News Author

Leave a Comment