Cu un surplus di 500 miyon florin NO tin ningun necesidad pa bai di acuerdo cu un Rijkswet!
E Rijkswet Financieel Toezicht ta un de temanan cu parlamento ainda no a haya tur informacion pa por debati Ariba dje. Na un manera secreto, tras di porta sera gobierno a comparti algun informacion (no tur) cu Parlamento den luna di juni 2025. Mientrastanto ta reina un silencio hermetico riba e tema di rijkswet. Por lo menos loke no sa ta cu Partido Futuro ta cla pa bende Aruba su lucha, su autonomia y su status aprte pa un sakito di placa! E Rijkswet aki tawata un di e exigencianan y condicionan di gobierno di Hulanda durante pandemia pa Aruba por haya financiamento.
Temponan a cambia y awor e situacion pa pais Aruba ta totalmente diferente cu tempo tawata discuti e condicionan di Rijkswet Financieel Toezicht. Actualmente pais Aruba su situacion financiero a mehora drasticamente danki na e bon maneho financiero cu a wordo hiba pa gabinete Wever Croes 2. Na e momentonan aki Pais Aruba tin un surplus di 500 miyon, pais Aruba ta pagando su debenanan bek, Aruba ta cumpliendo cabalmente cu tur su obligacionan y no tin ningun necesidad ni urgencia mas pa accepta e Rijkswet Financieel Toezicht. Te hasta e debe cu Mike Eman a crea nos pais ta bahando, anto e ora e pregunta ta surgi kiko ta e necisidad pa bai di acuerdo cu e Rijkswet???
Nos tin supervision financiero ancra den nos Landsverordening Aruba Financieel Toezicht kiermen tin tur cos ‘’in place” pa garantiza un bon supervision y bon maneho financiero.
Segun Statuut di 1954 solamente locual ta para den articulo 3 ta : “ aangelegenheden van het koninkrijk” y por lo demas nos ta completamente autonomo. Esaki a ser declara tambe e tempo ey na e “ dekolonistie commissie” di Nacion nan Uni New York cu nos no ta colonia mas di Hulanda, pero boluntatiamente a keda den Reino Hulandes. Despues di 1986 e posicion ey a ser duna na Aruba tambe cu nos Status Aparte cu hopi hende a lubida hopi liher e importancia di ta liber.
Libertad di un pais NO tin prijs y esnan cu ta cla pa bende Aruba pa un sakito chikito di placa porta NO ta compronde kiko kiermen Libertad!
Nos semper tabata contra pa Aruba a base di placa laga nos autonomia financiero bay y segun un rapport di IMF ta e Rijkswet a stroba Corsou di crece economicamente. Nos cu a lucha pa locual nos tin desde 1986 y nos a laga tur e instrumento nan economico/ financiero pa gobierno nan haci e trabou y cu awe tin cu a faya nos esaki no ta hustifica pa e cama cu nos a laga pa nan drumi awor laga Hulanda cu Rijkswet yene cu clabo pa stroba nos di crece.
Nos gobierno a laga atras un pais stabiel, cu mas di 500 miyon florin di surplus, un turismo record y cu crecemento economico. E situacion financiero y panorama a cambia totalmente y consequentemente Aruba por cumpli cu e pago di e debe di pandemia na gobierno Hulandes sin ningun problema.
No por ta asina cu gabinete AVP sin Futuro por medio di minister Wever y minister Gerlien Croes kier bai di acuerdo pa accepta un Rijkswet financieel toezicht a cambio di algun miyon florin y un reduccion di interes riba e prestamo di Covid anto Corsow dia a accepta e mesun tipo di rijkswet a haya ‘’kwijtschelding’’! Esaki NO por wordo considera un trato igual pa partnernan den reino y mi ta kere como un bon arubiano semper mester para firme pa haya e mesun trato den reino.
Si ta pa considera pa accepta e rijkswet financieel toezicht mi ta kere lo husto lo mester ta cu Hulanda ta paga TUR nos debenan manera cu nan a haci 10-10-10 pa Corsow.
E argumento cu NO mester tin miedo di supervison financiero NO ta valido. Desde anja 2014 nos tin supervision financiero caba. Desde 2014 CAFT ta na Aruba cu e ta e colegio cu hulandesnan ta forma parti di dje cu ta supervisa nos maneho financiero.
Tur e normanan cu financiero cu gobierno mester cumpli cune ja caba ta ancra den e LAFT cu ta e Landsverordening Aruba Financieel Toezicht y ta normanan cu nos ta cumpliendo cu nan.
Si bai di acuerdo cu e Rijkswet financieel toezicht aki esaki ta nifica cu ta KITA autoridad di miembronan di parlamento pa trece cambio den e ley di reino aki. Ta kita autoridad di miembronan di parlamento pa VOTA riba e ley.
Esnan sinta den tweede kamer na Den Haag ta e uniconan cu por trece cambio den e ley y ta nan lo vota sea na fabor of contra e rijkswet financieel toezicht. Awor si kita bo voz di pueblo, kita derecho di miembronan di parlamento no kiermen kita bo autonomia anto e ora mi no lo sa kiko lo kiermen perde autonomia pa e gobierno AVP sin Futuro. Awor mi kier pa minister Wever, Eman y Croes splica pueblo con esaki NO ta afecta e derecho di amienda di nos como parlamentario??? Con nan kier considera pa kita nos derecho di parlamento??
Nos ta arubiano orguyoso, nos por ta chikito pero semper nos a demostra cu nos mes por.
Nos lo sigui vigila henter e desaroyo di Rijkswet di serca pa asina evita cu minister Wever y e gabinete AVP sin Futuro bende y entrega nos autonomia y pais sin motibo y sin hustificacion.
Nos NO por laga un gobierno illegetimo bende nos autonomia!