Recientemente nos KPA, Korps Politie Aruba of Cuerpo Policial di Aruba a cumpli 39 aña desde su formacion cu a tuma luga despues di Aruba su Status Aparte. Mr Edgar J Vos ( Watty) d.f.m., minister di husticia, un di nos estadistanan y politico cu mas trayectorio den husticia, despues di 1986 a tuma operacionnan over di Cuerpo Policial di Antias Hulandes ( KPNA) pa crea KPA.
Despues cu e cuerpo a tuma e funcionnan di orden y ley over di Antias, Aruba a mira e necesidad pa funda un School pa Polis, aki ta caminda Watty su legado a keda como fundado di School pa Polis y defensor di KPA.
Desde su fundacion e School pa polis a produci mas di 500 homber y muhe balente cu a asumi e
reto pa trece orden, paz y trankilidad den pueblo bou di hefenan di polis cu te dia di awe tin respet pa nan den comuinidad. Den e ultimo 39 añanan pueblo Arubiano a biba hunto cu su cuerpo policial, for di apoyo total cu a tuma luga tempo di e desaparicion di Natalie Halloway, te na e repudio nacional pa de Lannoy.
E fecha ariba cual KPA ta celebra y conmemora su dia, semper sa pone actividadnan pa subi e animo di nos cuerpo, pero e anja aki ta mira un bashi enorme y poco partisipacion, kico e mensahe aki ta realmente ?. Conmemorativo semper ta algo cu pueblo ta spera cu anticipacion. Sinembargo ta bisto cu cosnan no ta manera antes mas pasobra ta manera tin un falta di animo y e korps ta demotiva mirando un misa basta bashi.
E asistencia pober ta un barrometer cu por midi e señal di animo of di malcontento. Por ta existi e posibilidad cu aunke nos Cuerpo Policial tin hopi homber y muhenan balente, tin malcontento ? No ta un secreto cu KPA a pasa door di un cantidad substancial di Korpschef, di tur color y sabor, pero tambe di nacionalidadnan varia.
Tin posibilidad cu tin desconeccion entre e cabes, e curpa y e brasanan y pianan di Korps ?
Of porta tin un spina scondi cu diferente cambio tras di otro a trece un malcontento
entre e miembronan di dicho cuerpo ? Un cos ta sigur, nos KPA a cuida nos pueblo y
t’ey pa sirbi comunidad y mantene ordo. Pa por reenforsa KPA e maneho ta esencial , unda cu no tin maneho manera mester ta tin frustracion.