E deseo pa produsí na Boneiru mes 50% di fruta i berdura ku ta kome aki, ta birando realidat. Resientemente a pone e promé paso na LVV. Na LVV tin 12 kavel disponibel kaminda nos kunukeronan por planta bèrdura i mata.
Resien a entregá e promé kavel na Bonaire Daily Fresh. Diputado Kroon, lider di proyekto di LVV Maurice Adriaens i direktor di direktorado di Planifikashon i Desaroyo tabata presente pa e promé entrega ofisial di un kavel.
Bonaire Daily Fresh ta kultivá bèrdura hasiendo uso di ‘green house’ i ‘aquaponics’. Aquaponics ta un método kaminda ta kombiná kultivo di piská ku kultivo di bèrdura i mata.
Den e próksimo 6 luna LVV ta traha huntu ku Entidat Públiko Boneiru i WEB riba konstrukshon i tumamentu den uso di e sistema nobo. Segun kalkulashon e ‘greenhouse’-nan i e sistema di aquaponics ta bai produsí mas ku 12.400 kilo di bèrdura i 3000 kilo di piská pa aña.
Segun Maurice Adriaens inisio di e proyekto aki ta un momentu históriko. Den e temporada binidero LVV Boneiru ta bai stimulá mas di e tipo di proyektonan bunita aki. Esun ku ta interesá den un kavel pa kultivá produkto di agrikultura por tuma kontakto ku Maurice Adriaens na number di telefòn +599 717 – 6734. 
