Marinirnan di e Skuadron di Marina di Karibe di Aruba (MSC), huntu ku e destakamentu di Marinirnan di Sint Maarten ademas di gruponan di boto di Aruba i Kòrsou, ultimo tres simannan a trein huntu ku Marinirnan Merikano prosedente di “II Marine Expeditionary Force” durante e ehersisio “Caribbean Urban Warrior”. E ehersisio a tuma lugá na Camp Lejeune, e base di Kuerpo di Marina di Estados Unidos (USMC), aya na North Carolina.
E ehersisio tabata den e lus di Operashonnan Militar riba Terenonan Urbano (Military Operations in Urban Terrain MOUT). Banda di esei e patruyanan di opservashon avansá, tiradónan designá, ingenieronan di infantería i salbaguardia nan di kombate a ehersé treinen interkambiá, den kolaborashon ku Marinirnan Merikano di e segundo Divishon di Marina. E Marinirnan a trein riba nivel di sekshon den diferente fasilidat na e base, tal manera Treinen Interno di Inmershon di Infanteria, MOUT Mobil (operashon Militar Tereno urbano) i otro áreanan di enternamentu. Banda di atakenen sigun sekshon, tambe nan a ehersá opeashonnan riba nivel di trupa, entre otro un atake amfíbiko (asalto) i atakenan riba ophetonan den un aldea di entrenamentu.
Defensa Region Karibe pa añanan largu ya a bin ta traha huntu ku Marinirnan di Estados Unidos, komo un elemento di e kolaborason bi-nashonal entre e Kuerponan. Anualmente, tantu den Region Karibe komo na Estados Unidos, tin treinen konhunto. E kolaborashon ta reforsá e vínkulo mútuo i ta brinda chènsnan balioso pa un siña di e otro. Camp Lejeune ta brinda posibilidatnan úniko i ekstenso pa trein, pa medio di kual e Marinirnan por trein riba un nivel aun mas haltu ku ta posibel den region Karibe.
Durante e ehersisio, Komandante di Forsanan Naval den region Karibe, Komandante Walter Hansen, a trese un bishita di trabou na Camp Lejeune. Den kuadro di e bishita aki el a papia entre otro ku Teniente General Calvert L. Worth, Komandante di “II Marine Expeditionary Force”, tokante e kolaborashon bi-lateral i e refuerso mas aleu di e relashon militar entre e paisnan. Mes ora tambe el a bishita e Marinirnan di Defensa Region Karibe Hulandes i nan koleganan Merikano durante e ehersisio final konhunto di “Caribbean Urban Warrior”.
Danki na treinen nan intensivo tal manera “Caribbean Urban Warrior” e Marinirnan di Defensa Region Karibe ta keda kla pa nan tarea i huntu ku esei tambe e defensa di e parti di Karibe di Reino.
