Parlamentario Endy Croes ta sigui e desaroyo di hopi serca alrespecto un declaracion di Marisol Lopez Tromp diabierna ultimo. Nos tur ta corda cu desde 5 di Juni Marisol Lopez Tromp tabata den problema contnuo cu su partido POR. A trata na reconsilia pero no a logra. Marisol ta un individualista y no tabata POR traha den equipo. Formando parti di 3 diferente partido den lapso di 10 aña ta papia hopi di Bo mes. Dios spaar e siguiente partido!
/// Actitud di Marisol ta uno hilarico:
E actitud di Marisol Lopez Tromp ta uno hilarico y incomprendibel. Desde aña 2010 Marisol a saca su mes for di MEP y a bula cura hasiendo un pacto directo cu Mike Eman y AVP. Nos tur ta corda net despues di esaki con el a subi barco bay keiro na Alaska enbes di acudi na Partijraad di MEP pa duna cuenta dicon el a vota contra e liña di partido e tempo aya y a faborese un pakete di medida cual a bay asota pueblo, di acuerdo cu un convenio di Mike Eman y AVP den e famoso dialogo social. For di e momento ey Marisol a brasa Mike Eman bon duro y a join AVP pa despues subi lista di AVP. Talvez mester recorda pueblo kiko realmente a pasa pa pueblo por sa ta cu ken e ta deal.
/// Marisol tempo e ta MEP a wordo malamente lastra pa AVP:
Marisol tempo e tabata riba lista di MEP a wordo malamente lastra aña aden aña afor pa AVP. AVP semper a acusa Marisol cu alegacionan cu ela faborece famia Neme cu varios terenonan. Tabata papia di 10 tereno. Tambe el a wordo insulta y lastra cu a famoso “ Brug di Madushi”. Ta e mesun Speed Andrade y Patrick Paskel tabata lastre hunto cu miembronan di AVP manera Benny Sevinger y Mike Eman. Apesar di tur esaki Marisol a join AVP pa sostene fechoria y masacra Aruba.
/// Den 8 aña di AVP Marisol nunka a lansa su vos contra corupcion:
Den 8 aña di AVP nunka pero nunka Marisol a lansa su vos contra corupcion. Mester recorda cu Marisol tabata hasta Presidente di Parlamento representando AVP momento cu tur e corupcionnan den gran escala a tuma lugar. E mes a forma parti gritando “VOOR” pa tur e presupuestonan unda den 8 aña a presta 3600 miyon pa desgracia e pais aki financieramente. E mes a grita “VOOR” pa tur e proyectonan di Hospital, Watty Vos Boulevard, Green Corridor, Bo Aruba pa nombra algun. Nos por corda e caso grandi di corupcion di Paul Croes. Marisol tabata tey pero muisstil.Un acto coruptivo masha grandi. Marisol aki tampoko a lansa su vos contra corupcion. Mas acto di corupcion ta e casonan di Benny Sevinger/ Leoncita cu terenonan comercial. Aki tampoko Marisol a lansa su vos contra corupcion. El a brasa Speed, el a brasa Patrick, el a brasa Benny y Mike Eman tur e tempo y a laga tur e porkerianan aki di AVP pasa bou su nanishi.
/// Awe Bo kier hunga Santo y Yo no FUI?:
Foei Marisol. Awe Bo kier hunga Santo y Yo no Fui? Awe Bo kier papia di corupcion? Awe Bo kier cuestiona Evelyn Wever Croes y papia di Integridad? Bo a monta un show den Parlamento cu ayudo di medianan comprometi di AVP esta medianan di Speed y Patrick Paskel pa asina purba unfluencia pueblo y pinta e Gobierno Wever Croes malo? Bo a lubida cu esnan cu ta yuda Bo awe ta esnan cu a lastrabo semper y lo lastrabo bek den futuro. Nan a perde nan poder di plaka. Ta hustamente bou AVP e duo ey a cobra 7 miyon florin di pueblo y awor cu cranchi a sera nan a perde nan poder di plaka y ta buska un “saya” pa cologa na dije pa hasi daño na gobierno.
/// Marisol a bay POR y atrobe problema:
Di cabey voto Marisol a drenta Parlamento bek y pa suerte di bida a wordo confia cu un puesto di Minister cual no a dura largo. Problemanan interno pisa den POR door cu Marisol no ta comunica cu entre otro su propio Parlamentarionan. 10 Parlamentario a kita confiansa den dije mas 6 di 7 Minister a firma di no por traha cune. Atrobe tur hende ta malo pero Marisol so tin rason? Parlamentario Endy Croes ta termina bisando pueblo huzga pa Bo mes! 1 en 1 no por ta 3.