BonaireFeatured

Mester di maneho di bestia adekuá pa solushoná problemátika di kachó

Mester Di Maneho Di Bestia Adekua Pa Solushona Problematika Di Kacho

Norbert Tadema di Dogpartner Bonaire i kandidato riba lista di M21:

Resientemente atrobe tabatin un insidente ku mordementu,  kaminda kachó a morde vários kabritu mata i naturalmente Dogpartner Bonaire ta lamentá esaki. Un biaha mas, riba òrdu di gezaghèber,a pone e kachónan drumi i/òf a tira nan mata, loke no ta un muestra di amor pa bestia i esei ta lamentabel. Loke komo DogPartner Bonaire kada bes ta hala mi atenshon ta ku niun hende no ta puntra nan mes kon e problemanan akí a surgi i dikon te ainda nan ta oumentando. Kada biaha ta indiká e kachónan komo kulpabel, loke no ta korekto. Un kachó no ta bira agresivo di su mes. Semper ta trata di emoshonnan negativo persistente òf ku ta keda bini bèk, manera rabia òf miedu. E kachónan akí a aktua a base di nan instinto di yag, reforsá èkstra debí na formashon di grupo, pero no a base di agresividat. Mayoria biaha ora tin kaso di mordementu di hende, esaki tampoko no ta a base di agresividat, pero a base di defensa i komportashon di teritorio. Hende ta spanta i kuminsá grita i dal òf tira skòp, loke ta kousa ku e kachó ta sinti su mes ataká, pero tambe t’asina ku e kachó ta defendé ‘su kaya’. Ora ku ta trata di mordementu a base di instinto di yag, defensa òf teritorio, e kachó ta morde i laga lòs. E por morde mas biaha, pero den kaso di mordementu a base di agreshon, e kachó ta sker henter e kabritu òf e persona for di otro. Masha tiki biaha un kachó ta realmente agresivo. Esaki ta pasa sí naturalmente. Pero mayoria biaha kon bo ta anda inkorekto ku e bestia ta okashoná esaki.

Problema kreá

Pero pa bini bèk riba e pregunta ken ta berdaderamente kulpabel: naturalmente e kachónan a morde, pero nan ta e berdadero kulpabelnan? Nò! E ora ei ta doño di e kachónan ta realmente kulpabel? Nò, nan tampoko! E úniko i berdadero kulpabel di tur e insidentenan ku mordementu akí ta gobièrnu i lamentablemente kasi niun hende no ta komprendé esaki. Un splikashon kòrtiku: for di 1988 tin LEGISLASHON kaminda tin poné ku ta prohibí pa doñonan di kachó laga esakinan sin supervishon riba kaminda públiko òf riba tereno ku ta aksesibel pa tur hende. Nos gobièrnu tin komo tarea pa kontrolá kumplimentu korekto ku esaki, pero lamentablemente ya pa 25 aña esaki no ta sosodé. Si for di 1998 nan a mantené lei korektamente lo tabatin ménos kachó (pa motibu di embaraso no-deseá) i lo no tin òf kasi lo no tin insidente ku mordementu. Ta trata pues di un problema kreá pa motibu di keda sin mantené lei, i p’esei gobièrnu tin ku kubri gastu di doño di e kabritunan. Esaki pasobra ta gobièrnu ta kulpabel. E partidonan ku aktualmente ta na mando ta keda normalmente sin kumpli ku e legislashon aktual, ku un eksepshon remarkabel ku kada biaha tempu di kampaña pa elekshon ta primintí tur sorto di kos pa haña voto i pa keda sinta riba e stul. Nan no ta hasi esaki a base di stimashon pa bestia òf pasobra realmente nan ke solushoná e problema.

Falta di interes

E ora ei e gobièrnu aktual  ta grita atrobe ku ta pone problemátika di kachó haltu riba agènda. Loke nan ta bisa ta ku Stichting Dierenhulp (Fundashon Ayudo pa Bestia) hopi aña pasá kaba a entregá un ordenansa nobo di bestia (lei di bienestar di bestia) pa remplasá e legislashon aktual ku ta hopi antikuá, pero lamentablemente te ainda sin resultado. Hopi biaha nos ta tende komo kontesta ku ta Boneiru, pues mester di tempu pa implementá e adaptashon akí. Loke naturalmente ta hopi straño ku bista riba siguridat di nos siudadanonan. E gobièrnu aktual ku pues pa kasi 4 aña kaba ta enkargá pa atendé ku e problema di kachó, pa motibu di falta di interes no ta mira importansia di atendé ku e problema korektamente. Mi mes (DogPartner Bonaire) vários biaha kaba a indiká pa tuma akshon te ku finalmente nan a bisa ku na fin di luna di mart lo kuminsá ku un kampaña relashoná pa atendé ku e problema di kachó. Grandi tabata mi sorpresa, ora ku na fin di luna di mart nan no a kuminsá ku un kampaña, pero nan a lanta un grupo di trabou ku yen di ‘hende sabí’. Den e grupo di trabou akí tin empleado di gabinete di Gezaghèber, Supervishon i Mantenshon di Lei, ofisina di Diputado Kroon, ofisina di Diputado Thielman, Kuerpo Polisial, Ministerio Públiko i Departamento di Komunikashon. Algun dia pasá despues di 7 luna di tene reunion, nan a kuminsá ku e kampaña ku un promé poster relashoná ku kuido di kachó. 

Plan pa solushon

Komo amigu di bestia te den mi higra, no ta pòrnada mi ta kandidato pa e partido nobo M21. E partido akí, banda di tin hopi atenshon pa kada siudadano, tin hopi atenshon pa maneho di bestia tambe. Den esaki ami tin mag di dediká mi mes na solushoná e problemanan ku kachó. Entretantu tin un plan komprendibel i ehekutabel riba mesa pa solushoná e problema di kachó na satisfakshon di tur hende, kaminda no ta enbolbí solamente nos siudadanonan, pero tambe nos kunukeronan. Mi ta spera ku nos hendenan ta realisá ku e partidonan aktual lo por solushoná solamente un parti di e problema den un forma mas serio. Mi mannan ta kishikí pa kuminsá traha pa realmente mustra resultado, a base di stimashon i no a base di interes propio.    

Related posts

E colaboracion entre instancianan ta percura pa e exito di turismo den e pandemia Aruba tourism authority cu bishita di cortesia na e covid test center na aeropuerto

EA News Author

Parlamentario Benny Sevinger Hulanda no a introduci medida pero gabinete Wever Croes a crea medidanan

EA News Author

KVK a tene su Kick Off Mixer y Meet The Board 2024

EA News Author

Leave a Comment

Whatsapp Message