Un proceso legislativo pendiente desde aña 2009 .Diabierna ultimo Parlamento di Aruba a aproba, den forma unanime, e propuesta di ley pa introduci un sistema di supervision moderno pa operadornan di weganan di placa, manera casino, loteria y catochi.
E proceso pa por introduci un sistema di supervision mas optimal y moderno pa cu weganan di placa (‘Kansspelen’), a inicia como 12 aña pasa. Esaki den cuadro di recomendacionnan di Financial Action Task Force pa reenforsa y optimalisa Aruba su sistema financiero-bancario y minimalisa risiconan innecesario door di miho supervision.
Ora a drenta gobernacion na 2017 a hereda un propuesta di ley cu no tabata carga sosten amplio den comunidad ni den Parlamento, ya cu tabatin hopi preocupacion legitimo pa cu cierto aspectonan. Parlamento y Sindicato por ehempel tabata expresa cu e propuesta di ley mester por duna mas siguransa na e trahadonan di e Departmento di Asuntonan di Casino (DAC). E sector hotelero y di casino di nan banda tambe tabatin cierto otro preocupacion pa cu e propuesta di ley.
Minister Bikker hunto cu Parlamento a start un ciclo di consulta amplio cu tur sector. Un delegacion di Parlamento hunto cu Minister Bikker ademas a haci un bishita di trabou na e Gaming Board di nos hermana isla Corsou, pa mira con e ta funciona.
Pa medio di no menos cu 3 nota di cambio Minister Bikker subsecuentemente a adresa e preocupacionnan menciona. Tambe a modernisa y actualisa e propuesta di ley, introduciendo entre otro un base huridico pa, si Gobierno ta desea, den futuro cercano por tin e posibilidad pa introduci, a base di un decreto (‘Landsbesluit houdende algemene maatregelen’), weganan virtual, esta ‘online gaming’, bou di reglanan estricto, similar na e ley recien yama ‘Wet Kansspelen op Afstand’ di Hulanda.
Despues di deliberacion amplio, caminda cu Minister Bikker hunto cu colega Minister di Finansas, Economia y Cultura, mr. Xiomara Maduro, a duna splicacion amplio y detaya a base di e preguntanan ricibi, Parlamento a aproba e propuesta di ley unanimamente.
Minister Bikker ta gradici Parlamento, colega Ministernan, DWJZ, DAC, AHATA, Sindicatonan TOPA, SEPPA, FTA, SCCA, y un y tur cu a duna apoyo na e esfuerso noble y mutuo, pa por a logra cu awor Aruba tin un ley cu sosten amplio y por cumpli cu recomendacionnan internacional.