Recientemente e Titular di e Cartera di Transporte, Comunicacion y Sector Primario, sr. Chris Romero, tabata di bishita na Departamento Meterorologico di Aruba (Meteo). Durante e bishita aki, Minister Romero a haci uzo di e oportunidad pa felicita 2 funcionario nobo di e departamento cu a gradua recientemente pa nan studio di WMO Meteorological Technician, y como tambe un funcionario mas cu a obtene su diploma como Meteorologo.
Sr. Joël Kirchner y sr. Nigel Fuentes ta e funcionarionan cu a completa nan estudio como observador y ta laborando na Meteo como tal for di aña pasa caba.
Cu sumo orguyo y placer Minister Chris Romero a felicita sr. Rodney Tromp, kende recientemente a gradua como Meteorologo. Sr. Tromp tin un carera admirabel na Departamento Meteorologico di Aruba, unda cu el cuminsa como leerling- observator na aña 2003 y awor a culmina su estudionan como Meteorologo. Awor sr. Rodney Tromp lo sigui eherce su trabou na Meteo como meteorologo diploma, despues a pasa su period di stage exitosamente.
Minister Chris Romero a felicita y elogia e 3 funcionarionan cu nan logro academico, como tambe a gradici e departamento completo pa nan labor profesional y corecto cu nan semper a sa di hiba.
