Minister di Turismo y Salud Publico Sr. Dangui Oduber ta contento cu un otro weekend exitoso tras di lomba. Aruba ta den pleno recuperacion di su turismo y e cifranan no ta gaña. Den weekend cu a pasa aeropuerto di Aruba a ricibi casi 10 mil turista. Riba diasabra a yega 6069 turista di cual 5337 turista tabata procedente di Estados Unidos. Riba diadomingo aeropuerto a ricibi un total di 3828 turista di cual 3384 turista a yega for di Estados Unidos. Estados Unidos ta keda Aruba su mercado di mas importante, pesey semper ta keda monitoria e ruta nan aki di serca.
E exit strategy ta dunando e resultado cu nos kier mira, asina minister Oduber a trece dilanti.
Gobierno a tuma e decision cu Aruba ta bolbe bek na normalidad y asina elimina tur restriccion cu tawata existi. Cu esaki kier focus pa Aruba su recuperacion di turismo pa asina recupera e economia y crea oportunidadnan cu pais Aruba tin mester di dje.
Minister Oduber tin tur confiansa cu e aña 2022 ta e aña cu Aruba lo recupera turismo bek na e nivelnan di aña 2019. Mester sigui enfatisa cu e logro di Aruba su recuperacion ta di gradici na esfuerzo nan conhunto di Ministerio di Turismo y Salud Publico conhunto cu partners manera ATA, AAA, APA & AHATA.
Minister Dangui Oduber ta satisfecho y tambe optimista di con turismo lo sigui progresa. Turismo ta keda e driver principal di nos economia.
