En conexion cu e bishita Real na Aruba, un bunita evento cultural a wordo dedica na Famia Real riba Plaza Padu y tambe na e show di Bon Bini Festival na Fort Zoutman. Como cu ta prome biaha cu Princesa Amalia ta bishita Aruba, Fort Zoutman a luci un bunita ‘video-mapping’ na honor di Princesa Amalia.
E ‘video-mapping’ a consisti di potretnan di e Princesa hunto cu e diferente diseñonan cu nos por admira riba nos Escudo, Bandera, riba nos Casnan Floria y tambe tegels di Aruba su casnan tradicional.
Minister Maduro ta gradici e Comision Real y Elite Productions pa e bunita gesto y obra di arte aki na honor di Princesa Amalia. E ‘video-mapping’ ta un manera inovativo pa proyecta arte riba nos edificionan monumental, cu a wordo masha bon ricibi pa e publico presente. Masha danki pa e manera inovativo pa laga Pueblo biba nos cultura.
