Minister di Fiansa di Corsou a entrega un Nota di Cambio pa cu e proposicion di ley yama Algemene landsverordening douane en accijnzen (Alda) na Conseho di Minister pa aproba pa entrega na Parlamento. E Alda ta modernisa e leynan di aduana y exigencianan i ta combina e diferente leinan vigente aki den un solo ley. E Alda a ser entrega originalmente na Parlamento na aña 2016.
Minister Silvania a tuma e decision pa termina e trayecto di Alda, den interes tanto di e organisacion di Aduana como di e sector comercial. E Alda ta cumpli cu e standartnan internacional mas recien di e tratadonan cu Corsou ta miembro di dje. Na nivel local, e Alda lo ta un mehoracion importante den e area di siguridad legal, tanto pa e organisacion di Aduana como pa e sector empresarial, dor cu e ta defini mas miho e derechonan y e debernan, for di e declaracion i e calculacion di e impuesto i impuesto di importacion cu mester paga, te na obhecion apelacion.
Alda tambe ta mehora e posibilidad nan di comunicacion digital entre Aduana y importadonan, tanto den declaracion como den control, ta haci posibel pa haci e proceso di importacion mas lihe cu ‘pre-arrival’ declaracion, y ta haci posibel pa indica empresanan cu tin nan administracion, siguridad y control interno na ordo, y p’esei lo por importa of exporta producto den un manera simplifica, cu lo conduci na cu tur partidonan envolvi ta spaar tempo gasto. E Alda y e Nota di cambio ta forma e base pa por haci e cambionan ariba menciona. Asina Parlamento trata i acorda e lei lo sigui traha cu diligencia riba e areglonan adicional cu mester soru pa e traspaso pa ehecucion di e lei nobo cu tur e mehoransa cu esaki ta trece cune, pasa mas pronto i flexibel cu ta posibel.
Cu e proposicion aki e 0% di tarifa di impuesto riba importacion di auto electrico existente ta wordo amplia pa otro vehiculonan electrico manera pick-up, bus i scooter. Finalmente, e posibilidad pa otorga exsoneracion pa por ehempel donacionnan pa organisacionnan di caridad i deporte ta wordo amplia.