Q
Durante conferencia di prensa di Gobierno di Aruba, sra. Shinouska Albertus coordinador di Leerwerktraject (LWT) a elabora riba e oportunidad cu LWT ta brinda hobennan pa termina nan estudio secundario. LWT ta pa hobennan entre edad di 17 y 25 aña cu pa un of otro motibo no a logra termina nan estudio secundario. E LWT tin tres diferente aspecto; e prome ta e aspecto educativo unda cu e hobennan ta bin tres biaha pa siman scol, esaki ta tuma luga na EPB Hato. E estudionan cu ta wordo ofrece ta: Conocemento Basico di Mantencion y Conocemento Basico di Beyeza. Na di dos luga tin e aspecto laboral unda e hobennan ta bay stage na un compania apunta, esaki ta sosode e dos otro dianan den siman 8 ora pa dia. Y por ultimo e aspecto social unda e hobennan ta wordo guia den grupo y individual. E acogida ta hopi grandi e aplicacionnan a inicia, pues esnan cu ta interesa por inscriba riba e website: www.oaa.aw. Aki por aplica pa e estudionan di Leerwerktraject como tambe pa OAA. Leerwerktraject ta inicia dia 10 di october proximo.