Minister Geoffrey Wever: Preparando un biahe strategico cu delegacion di comerciantenan pa Colombia

Un delegacion di comerciantenan ta preparando pa un biahe pa Colombia. E meta ta pa logra importa productonan na prijsnan mas bentahoso, cual por ser traspasa na consumidornan den forma di prijsnan mas abou, y asina yuda baha costo di bida aki na Aruba. Minister di Asuntonan Economico, mr Geoffrey Wever ta liderando preparacionnan hunto cu e grupo di comerciantenan local pa determina hunto e programa y strategia di e biahe.

Aruba su economia ta uno chikito y ta depende riba importacion di mayoria di productonan. Cu un posicion strategico den Caribe entre Merca y America Latino ta esencial explora oportunidadnan comercial cu ta na beneficio di nos comerciantenan y consumidornan. Den e cuadro aki ta importante fortifica e relacionnan economico cu paisnan den region.

Maneho economico di ministerio di Asuntonan Economico, Comunicacion y Desaroyo Sostenibel ta basa riba mantene y reenforsa partnershipnan existente riba tereno economico. Un partner importante ta sector priva di Aruba den esaki pa logra beneficionan di un cooperacion estrecho cu paisnan den region. 

Pa e motibo aki riba 22 di februari 2022, Minister Geoffrey Wever, hunto cu Departamento di Asuntonan Economico y Industria lo organiza un “Business Roundtable on Trade Relations in Colombia” cu sector priva. 

Meta di e consulta ta pa scucha di sector priva kico ta nan deseonan, ki ta e oportunidadnan cu e mercado di Colombia tin pa ofrece y con gobierno di Aruba por facilita esaki. 

Un economia chikito pero cu un posicion strategico Aruba mester explora cada oportunidad comercial den region y den e caso aki Colombia cu ta trese beneficionan economico pa nos comerciantenan y consumidornan segun minister Geoffrey Wever. E consulta aki ta mustra e importancia di traha hunto cu nos comerciantenan pa hiba un maneho na beneficio di desaroyo economico di Aruba.