Minister di Turismo, Asuntonan Economico, Trafico y Telecomunicacion (TEATT), sra. Grisha Heyliger-Marten, a felicita e equipo nacional di futbol di Curaçao pa su debut historico den Copa Mundial di FIFA. El a expresa cu, apesar di e resultado di 7–1 contra Alemania, Curaçao a duna Caribe Hulandes y henter e region di Caribe un momento di orguyo cu lo no ser olvida.
Curaçao, e pais mas chikito pa loke ta poblacion cu algun biaha a cualifica pa e Copa Mundial di FIFA, a haci historia diadomingo ora nan a drenta e escenario mundial pa prome biaha. E momento aki a bira ainda mas memorabel ora Livano Comenencia a anota e prome gol den historia di Curaçao den un Copa Mundial, igualando e score temporalmente contra un di e nacionnan di futbol mas poderoso.
“Un gol ainda ta un bitoria,” Minister Heyliger-Marten a declara. “E alegria cu mi a biba, y cu hopi fanatico a biba ora Curaçao a score, tabata mucho mas grandi cu e resultado final. E gol ey tabata un bitoria structural. E tabata historia. E tabata orguyo. Tabata mundo henter scuchando tocante Curaçao.”
E Minister a señala cu e peso emocional di e ocasion aki tabata bisto for di cuminsamento di e partido.
“For di e momento cu e hungadornan a drenta veld y a lanta e bandera di Curaçao, mi a haya hanebuel (goosebumps). Pa un nacion di isla asina chikito yega na e nivel aki, para riba e escenario ey, y score den su prome aparicion den Copa Mundial, ta algo berdaderamente special,” el a bisa.
Minister Heyliger-Marten a indica cu e caminda cu Curaçao a cana ta un recordatorio cu tamaño no ta determina ambicion, visibilidad, talento of orguyo nacional.
“Alemania a demostra su calidad, pero Curaçao a demostra su curason. E hungadornan a representa no solamente nan pais, sino tambe e soñonan di comunidadnan di islanan chikito na tur parti. Nan a corda mundo cu Caribe ta pertenece riba tur escenario, incluyendo e escenario mas grandi di futbol,” el a expresa.
Tambe el a destaca e importancia di e reconocemento di Guinness World Records pa Curaçao como e pais mas chikito pa poblacion cu a cualifica pa e Copa Mundial di FIFA, yamando esaki un bito di importancia regional.
“E logro ey caba ta historico. Pero awe, Curaçao a agrega un capitulo inolvidabel mas door di score su prome gol den Copa Mundial. Pa Curaçao, pa Caribe Hulandes, y pa tur nacion di islanan chikito, esaki tabata un momento di un orguyo enorme,” Minister Heyliger-Marten a bisa.
E Minister a encurasha e equipo di Curaçao y e fanaticonan pa sigui mantene nan cabes na halto segun e torneo ta continua.
“E resultado final lo keda registra den e buconan, pero e historia cu Curaçao a baci awe tambe lo keda. E gol ey lo biba hopi mas leu cu e partido aki,” el a conclui. “Curaçao a gana caba algo masha importante: e respeto, atencion y admiracion di mundo henter.”