Minister Maduro a ricibi presentacion di Kenniscentrum Immaterieel Erfgoed Nederland (KIEN) tocante aruba su patrimonio cultural intangibel

Recientemente, Minister di Cultura Xiomara Maduro a reuni cu e representantenan di organisacion KIEN, sra. Saskia van Oostveen y sra. Kelly Warnaar cu tabata di bishita na Aruba den cuadro di Aruba su patrimonio cultural intangibel. Representante di cultura di UNESCO Aruba sra. Ruby Eckmeyer, representante di UNOCA sra. Josephine Pieters y representantenan di Notionflows, un compania specialisa den diseño di website, sra. Roxana Rodriguez y sr. Rodolfo Rodriguez tambe tabata presente den e reunion cu Minister Maduro. Nan a presenta e concepto di e website pa e patrimonio cultural intangibel (PCI) di Aruba cu por cierto tambe lo fungi como website di UNESCO Aruba. 

E proposito tras di e bishita di KIEN na Aruba ta pa e organisacion Hulandes wordo introduci y exponi na e cultura di Aruba y asina ricibi un miho bista di tur locual ta forma parti di nos herencia y patrimonio cultural. Sra. van Oostveen y sra. Warnaar a comparti cu nan tambe kier contribui na empodera y crea conscientisacion riba e topico di PCI y esaki ta cuminsa na inventarisacion y documentacion. Den e presentacion di KIEN, e representantenan a elabora riba e definicion di patrimonio cultural intangibel y e 5 categorianan cu ta defini e diferente formanan di PCI. E categorianan ta entre otro tradicion oral, obra di tarima, ritual y festividad (celebracion), conococemento y uzo di naturalesa y artesania of tecnica tradicional. A subraya durante e presentacion cu patrimonio cultural no ta encera edificio of obheto pero e esencia ta hende. 

Den un bunita resumen, KIEN a menciona con patrimonio cultural y cultura den su totalidad ta contribui na e desaroyo humano y union entre hende, ta genera entrada a base di talento y tecnica cultural y ta contribui na un futuro sostenibel social. PCI ta fungi manera un liña cu ta conecta pasado, presente y futuro. E ta crea un cultura dinamico cual ta den liña cu e pensamento di Minister Maduro “cultura, bo tin cu bib’e”.  Pa e motibo aki, Minister Maduro a gradici e representantenan di KIEN pa ta presente na Aruba y na e manera aki por experencia locual ta haci e cultura di Aruba único, pasobra nos isla tin un historia y cultura comparti cu e otro paisnan den Reino Hulandes pero nos tambe tin locual ta haci nos único y asina a menciona entre otro nos Dande. 

Minister Maduro a gradici UNESCO Aruba y UNOCA pa yuda contribui na colaboracion y esfuerso pa salvaguardia nos patrimonio cultural intangibel. Tambe e mandatario a subraya e importancia pa pueblo ta na altura di e importancia tras di proteha, salvaguardia y asina aprecia nos patrimonio cultural pasobra na Aruba tambe tin tesoronan cultural como parti di nos patrimonio. Minister a termina e reunion uniendo su mes na e pensamento di KIEN cu patrimonio cultural ta brinda oportunidad pa enseñansa, inclusion, economia, ecologia, participacion y union den Reino.