Diabierna minister Oduber tabata na Houston, caminda e la haña un tour di e Texas Medical Center (TMC) Innovation y alavez e la bishita MD Anderson Cancer Center cu su Mahestad Reina Maxima y tambe minister Kuipers. E dos centro medico nan aki ta renombra como un di e mihonan rond di e pais. Durante e bishita aki nan a haña diferente presentacion di experto nan den e ramo di salud y tambe oportunidad pa puntra pregunta. E bishita aki tabata uno fructifero caminda cu cooperacionan internacional a wordo estableci y diferente informacion a wordo adkiri pa asina por trese esaki bek y incorpora na pais Aruba.
Un di e meta di e bishita aki ta pa a fortifica e laso cu tin entre Princes Maxima Centrum na Hulanda y MD Anderson regardando cancer di mucha y cancernan di sanger manera leukemia. Esaki ta algo cu lo por beneficia aseguradonan di AZV den combatimento di e malesa di cancer, segun e mandatario. Minister Oduber ta keda busca solucionnan pa mehora e calidad di cuido na Aruba. Estableciendo relacionnan di trabou importante cu sigur lo beneficia Aruba den e dia di mañan.
Minister Oduber tabata hopi contento di por a haña e oportunidad aki, cual ta crucial pa por crea cooperacion internacional nobo, fortifica esunan existente pero tambe siña mas tocante diferente innovacion nan rond di mundo den e ramo di salud. Tambe e ta sumamente orguyoso di por a hiba palabra den nomber di Aruba pa enfocando riba e importancia di innovacion den cuido y con tecnologianan avansa por yuda mehora calidad di cuido. Entre otro, e la menciona cu Aruba a wordo destaca y reconoci internacionalmente danki na e eficiencia di nos “Aruba Health App”.
