Durante su participacion den e di 21 Foro di Paisnan y Teritorionan Ultramar (OCTs) di Union Europeo na Aruba, Minister Plenipotenciario Drs. Gracita R. Arrindell tabatin e oportunidad di reuni cu Dr. Stacy Richards-Kennedy, Manager Regional pa Caribe di e Banco di Desaroyo di America Latino y Caribe (CAF).
CAF ta hunga un rol vital den e promocion di desaroyo sostenibel y integracion regional den henter America Latino y Caribe. Como un di e institucionnan financiero multilateral mas importante di e region, CAF ta brinda finansiamento, expertisia tecnico y apoyo strategico na proyectonan tanto den sector publico como priva cu ta contribui na crecemento economico y progreso social.
Minister Plenipotenciario Arrindell a indica cu e reunion tabata hopi informativo y cu Sint Maarten lo explora mas a fondo e relacionnan cu e institucion financiero aki. El a agrega: “Mi ta kere firmemente cu Sint Maarten, mescos cu otro nacionnan Caribense, mester tin camindanan alternativo pa move padilanti cu nan interesnan nacional, y CAF ta un di e rutanan ey.”
CAF a wordo estableci na 1970 pa un grupo di paisnan cu e obhetivo di fomenta desaroyo den e region Andino. Atraves di e añanan, e banco a expande su miembresia pa inclui un variedad amplio di paisnan di America Latino, Caribe y Europa. E institucion ta enfoca riba areanan clave manera infrastructura, energia, transporte, awa y sanacion, educacion, salud, transformacion digital y sostenibilidad ambiental.