Dialogo entre Gobierno di Aruba y representantenan di e sector di UTV y ATV a continua dialuna den un ambiente constructivo, cu e meta di acerca posicionnan y sigui traha na un solucion concreto pa e situacion actual.
Minister di Vivienda, Infrastructura, Servicio Interno y Telecomunicacion drs. Rene Herdé a indica cu e proceso ta avansando den bon esfera y cu e partidonan envolvi ta demostrando disposicion pa scucha otro y busca punto di encuentro.
Como parti di e siguiente fase, ta trahando riba formacion di un comision cu representacion amplio di e sector. E intencion ta pa diferente interes y experiencia dentro di e sector haya representacion, pa asina e dialogo por sigui di forma structura y orienta riba solucionnan concreto.
Un aspecto importante den e combersacionnan ta e preocupacion cu tin entre companianan y trahadornan relaciona cu continuidad di nan actividad y empleo.
Gobierno ta consciente di e incertidumbre cu e situacion ta causando y ta tene e aspecto economico y laboral debidamente na cuenta den busca di un salida.
Minister Herdé a enfatisa cu Gobierno ta trata e proceso cu transparencia total, compartiendo informacion cu e sector y manteniendo e dialogo habri durante cada fase. E meta ta pa yega na un solucion cu ta tene cuenta cu e diferente interesnan envolvi y cu por brinda mas claridad y perspectiva na e sector.
E dialogo ta continua mientras Gobierno ta pendiente di e caso cu ta programa den Corte diahuebs awo. Te na e momento ey, Gobierno lo sigui haci tur esfuerso posibel pa acerca partidonan y explora espacio pa un entendemento.
Segun Minister Herdé, e prioridad ta keda cla: busca un solucion responsable y balansa, cu ta tene cuenta cu e marco aplicabel, pero tambe cu e realidad di companianan y e personanan cu nan trabou ta conecta directamente cu e sector.
Gobierno di Aruba lo sigui mantene e sector informa di e desaroyonan relevante mientras e proceso ta avansa.
