Recientemente Minister di Husticia y Asuntonan Social Sr. Rocco Tjon, a reuni cu Procureur General di Hoge Raad esta Sr. Bleichrodt. Ta trata di reunionnan strucutural cu ta tuma luga pa asina mantene un bon comunicacion cu reino. Durante e reunion aki Procureur General Sr. Bleichrodt a inidica di ta satisfecho cu e manera cu HOF ta atende cu casonan actualmente, mirando cu ta e casonan di HOF cu hende ta apela, ta esnan cu ta bay casacion. Pues un reunion positivo y ta satisfecho cu e calidad di rechtspraak den reino.
Hoge Raad ta e tribunal supremo di Hulanda kende ta trata casonan civico, penal y di impuesto. Esaki ta conta pa paisnan di Reino Hulandes den Caribe tambe esta; Aruba, Curaçao, Sint Maarten, Bonaire, Saba y Sint Eustatius. E tribunal supremo no ta un tercer instancia, pero mas bien un tribunal di casacion. Esaki ta nifica cu e tribunal supremo ta evalua si un tribunal inferior (rechtbank/gerechtshof) a aplica e ley na un manera corecto y si e procedemento a wordo ehecuta corectamente.
E procedura di casacion ta conta cu algun punto clave, den e caso aki, e tribunal supremo no ta establece hechonan, pero ta basa su mes riba hechonan y circunstancianan estableci caba pa e tribunal inferior (rechtbank of gerechtshof). Durante e proceso di casacion, e tribunal supremo ta evalua si e tribunal inferior a interpreta y aplica e ley corectamente. Hoge Raad ta evalua tambe si e tribunal inferior a trata e caso sin comete eror di e procedemento y si e “uitspraak” a wordo motiva na un manera comprendibel.
Por ultimo, e tribunal supremo ta encarga cu tres tarea specifico; contribui na e desaroyo husticial, brinda “rechtsbescherming” individual, y garantisa “rechtseenheid”. Pa e motibonan aki, e ta importante pa mantene un bon comunicacion cu e tribunal supremo, pa asina garantisa cu nos tribunal inferior ta ehecutando e trabou debidamente, ora ta trata casonan penal.
