Durante seshon públiko di Konseho Insular, frakshon di MPB a presenta un moshon pa tuma medidanan inmediato kontra e aumento alarmante di kriminalidat na Boneiru, ku regularmente ta envolví hóbenan. E moshon a keda aproba unanimemente dor di Konseho Insular.
E moshon ta reflehá e preokupashon profundo den komunidat riba atrako, ladronisia, tiroteo i otro tipo di delitonan ku ta kousa un ambiente di miedu i inseguridat. Segun MPB, e situashon aktual ta eksigí liderato klaro i un enfoke kordiná entre tur instansia relevante.
MPB ta proponé formashon inmediato di un grupo interdepartamental, bou di liderato di e gezaghebber, ku ta inkluí:
Kuerpo Polisial (KPCN)
• Mental Health Caribbean
• Akseso
• Reclassering Nederland
• Koordinadó di skolnan
• Representantenan di un plataforma hubeníl
E grupo lo tin komo meta prinsipal:
Hasi un inventarisashon di e problemátika i su relashon ku hóbenan.
• Kompartí indikadónan i eksperensianan entre instansianan.
• Buska e raíz di e situashon.
• Proponé solushon konkreto pa prevenshon i akshon kordiná.
• Formulá un plan di akshon ku ta orientá riba resultado konkreto.
E moshon ta stipulá ku e grupo mester kuminsá su trabou den 30 dia despues di aprobashon, i presenta un rapòrt preliminar den 3 luna. Tambe, e moshon ta pidi pa buska fondo lokal i analisá e posibilidat di un kuerpo boluntario di polis.
MPB ta indiká ku nos no por sigui warda: mester tuma akshon pa protehá nos komunidat i duna hóbenan un alternativo konstrukutivo promé ku e situashon bira aún mas grave.
