Entidat Públiko Boneiru i SKAL ta duna di konosé ku e aña akí no ta organisá e aktividat di ‘Chispa di Wan ku Pedu’. A tuma e desishon akí debí na e situashon sosial aktual den nos komunidat.
Tradishon di San Juan i San Pedro
Pa hopi aña kaba e selebrashonnan di San Juan i San Pedro ta un komponente kultural importante na Boneiru. Den e kuadro akí anteriormente SKAL tabata organisá e evento ‘Chispa di Wan ku Pedu’. Esaki tabata un enkuentro festivo ku kandela, músika tradishonal i un sintimentu di solidaridat. E evento akí tabata marka inisio di e periodo di San Juan i San Pedro na nos isla.
Tempu pa reflekshon
Mirando e desafionan sosial ku Boneiru ta pasando aden aktualmente, Entidat Públiko Boneiru ta haña ku no ta apropiá pa e aña akí organisá òf stimulá un aktividat festivo di e índole aki. Na lugá di esaki Entidat Públiko Boneiru ta hasi un yamada riba tur hende pa tene un momentu di reflekshon i konektividat huntu ku otro habitantenan.
Tradishon por sigui, pero ku rèspèt
No ta e intenshon di Entidat Públiko Boneiru pa para òf stroba e selebrashonnan tradishonal di San Juan (dia 23 i 24 di yüni) i San Pedro (dia 28 i 29 di yüni). Sí Entidat Públiko Boneiru ta hasi un yamada riba nos komunidat pa tene e selebrashonnan akí na un manera respetuoso i pasífiko, den bon harmonia ku otro i ku kuido pa nos ambiente direkto.