Parlamentario Dangui Oduber a presenta diferente pregunta na minister di Salubridad, Asunto Social, Cuido di Adulto Mayor y Maneho di Adiccion, sra. drs. Mervin Wyatt-Ras, tocante e situacion di pago di 11.7% di indexering pa personal di cuido na Aruba.
Algun luna pasa, como ex Minister di Salud, Gabinete Wever-Croes II, a tuma un desicion pa manda un intruccion na AZV pa cumpli cu e pago di indexering di 11.7% pa tur personal di cuido, mescos cu ta aplica pa empleadonan den sector publico. E instruccion aki a wordo entrega formalmente na AZV dia 20 februari 2025.
E parlamentario ta pone enfasis riba e hecho cu actualmente AZV tin un saldo positivo (surplus) di Afl. 106 miyon, y cu segun proyeccion, tanto pa e aña aki como pa e siguiente, AZV lo sigui tene un saldo positivo. E surplusnan aki mester wordo inverti den personal di cuido, den specialistanan medico, den ekipo, training y mehoracion di calidad di cuido. Specificamente sr. Oduber a expresa cu: “Awo cu tin e espacio financiero, mi ta kere cu e momento a yega pa cumpli cu e pago aki y pa duna e personal di cuido e respet y reconocemento cu nan tanto merece, specialmente mirando e esfuerso inmenso cu nan a pone durante e pandemia di COVID-19,” segun e parlamentario.
Durante e pandemia di COVID-19, e personal di cuido na Aruba a demostra un nivel sobresaliente di sacrificio y compasion, trahando oranan largo y enfrentando situacionnan sumamente dificil pa proteha y salba bida. E solidaridad cu a domina Aruba den e tempo difícil aki no por wordo lubida, y pa esaki, e Parlamentario ta bisa cu ta hopi importante pa e muestra di gratitud concrestisa entre otro den forma di e pago di indexering.
“Mescos cu e sector publico a ricibi 11.7% di indexering, ta momento pa e sector di cuido tambe ricibi esaki. Mi ta spera cu Minister Wyatt-Ras por sigui cu e instruccion y haci’e un realidad”, Oduber ta indica. “Tur esaki a wordo laga cla atras pa minister Wyatt Ras. No por tin ningun motibo pa no duna nan e indexering aki! Nos ta pidi minister Wyatt Ras pa pone un fecha pa tur esnan den cuido medico ricibi nan indexering di 11.7% cu nan merece”, Parlamentario Oduber ta finalisa bisando.
