Detenshonnan pa manehá bou di influensia di alkohòl
Den e dianan ku a pasa, polis a detené kuater(4) shofùr pa manehá bou di influensia di alkohòl.
Djárason 27 di mei, alrededor di 3.10 or di mardugá, a detené un hòmber di inisial
T.G.J.d.V. di 19 aña di edat riba Kaya Grandi. Un patruya a mira dos persona riba un skuter den direkshon prohibí i a duna e shofùr señal pa para pa un kòntròl. Durante kòntròl, e sospechoso tabata mustra diferente karakterístika di un persona ku ta bou di influensia i a hasi un tèst di supla kuné. A resultá ku el a konsumí mas alkohòl ku ta pèrmití pa lei. A konfiská reibeweis di e sospechoso.
Djárason 27 di mei, alrededor di 2.15 or di mardugá, a detené un dama di inisial
G.M.R. di 40 aña di edat na Kaya C.E.B. Hellmund. Un patruya a para e vehíkulo di e sospechoso pa un kòntròl rutinario. Durante e kòntròl, e no por a mustra un reibeweis bálido. Ademas e tabata mustra diferente karakterístika di un persona ku ta bou di influensia. A hasi un tèst di supla kuné i a resultá ku el a konsumí mas alkohòl ku ta pèrmití pa lei. A detené e sospechoso i el a haña but pa manehá sin reibeweis.
Djamars 26 di mei, alrededor di 1.35 or di mardugá, a detené un hòmber di inisial S.W.S.B. di 20 aña di edat riba Kaya Nikiboko Sùit. Un patruya a mira un skuter ku dos persona riba dje i a duna e shofùr señal pa para pa un kòntròl rutinario. A hasi un tèst di supla ku e sospechoso i a resultá ku el a konsumí mas alkohòl ku ta pèrmití pa lei. E sospechoso a haña prohibishon pa manehá di 3 ora.
Djamars 26 di mei, alrededor di 1.25 or di mardugá, a detené un hòmber di inisial T.B. di 21 aña di edat na Kaya Libertador Simon Bolivar. A para e sospechoso riba su skuter durante un kòntròl di tráfiko dirigí riba konsumo di alkohòl i a resultá ku el a konsumí mas alkohòl ku ta pèrmití pa lei. E sospechoso a haña prohibishon pa manehá di 4 ora.
A transportá tur sospechoso pa warda di polis pa kontinuá ku e trámitenan korespondiente. Aki nan lo haña un prosèsferbal tambe.
Aksidente entre dos outo
Djamars 26 di mei, alrededor di 10 or di mainta, ‘meldkamer’ sentral a risibí notifikashon tokante un aksidente entre dos outo riba Kaminda di Gurubu. Un di e shofùrnan a resultá heridá i ambulans a transport’é pa hòspital pa kòntròl médiko. E otro shofùr a haña but pa manehá sin seguro bálido. Konforme e maneho di ‘botsen is blazen’, a hasi un tèst di supla ku solamente un shofùr, i no tabatin indikashon di uso di alkohòl. Pa motibu di prioridat médiko no por a hasi tèst di supla ku e otro shofùr. E outonan a keda ku daño konsiderabel.
Kiebro na kantor di number
Djamars 26 di mei a drenta keho di kiebro den un edifisio na Kaya Pedro Luis Brion. Deskonosínan a haña akseso na e kantor di number i a bai ku diferente tas ku sèn kèsh. Ta investigando e kaso.
Ladronisia for di vehíkulo na sitio di sambuyá
Djaluna 25 di mei a drenta keho di ladronisia for di un outo ku tabata stashoná na altura di ‘1000 steps’ riba Kaminda Turístiko. Mientras e okupantenan tabata snòrkel, deskonosínan a bai ku entre otro tas, tres telefòn iPhone, pòtmòni ku kontenido, sèn kèsh i brel di solo. Ta investigando e kaso.
Kòntròl planiá di tráfiko
Den oranan di atardi di djaluna 25 di mei, aspirantenan pa polis bou di guia di agentenan polisial a tene kòntròl di tráfiko riba Kaya Internashonal. E kòntròl tabata pa mantené seguridat den tráfiko. Durante e kòntròl aki a para i kontrolá 29 vehíkulo i a duna 6 but.
E butnan tabata pa e siguiente violashonnan:
2x pa manehá sin seguro bálido;
4x pa manehá sin reibeweis i sin seguro bálido.
Ademas a konfiská un outo durante e kòntròl di tráfiko. E shofur no por a mustra su reibeweis tampoko dokumentunan di seguro. Ademas e plachinan di number riba e vehíkulo ta notifiká na polis komo pèrdí i e shofùr no kier a bisa di ken e vehíkulo ta. Pa e motibu aki a konfiská e vehíkulo i e plachinan di number.
Kòntròlnan di tráfiko ta kontinuá.
