Vèn a alkansá peaton
Djárason 29 di òktober, alrededor di 6.50 or di anochi, ‘meldkamer’ sentral a risibí notifikashon tokante un aksidente riba Bulevar Gobernador N. Debrot na altura di Sabadeco. Ta trata di un aksidente entre un vèn i un peaton.
Na yegada di polis, personal di ambulans tabata atendé e víktima. Shofur di e vèn tabata direkshon sùit i probablemente un otro vehíkulo a blèndu e. Seguidamente el a alkansá e víktima despues di kua e víktima a bai kai abou den matanan kantu di kaya. Ta trata di un dama ku tabata kana huntu ku otronan.
Konforme e maneho di ‘botsen is blazen’ a hasi un tèst di supla ku shofùr di e vèn, ku resultado negativo. Ambulans a transportá e víktima ku urgensia pa hòspital pa tratamentu médiko.
Ladronisia for di gòlfkar
Djárason 29 di òktober a drenta keho di ladronisia for di un gòlfkar ku tabata stashoná na ‘Te Amo Beach’, situá na Kaya Internashonal. Deskonosínan a bai ku dos tas di mucha miéntras e okupantenan tabata landa. Den e tasnan tabatin entre otro produktonan di kuido pa mucha, un pòtmòni ku sèn kèsh i karchinan.
Djárason 29 di òktober a drenta keho di ladronisia for di un gòlfkar ku tabata stashoná na e sitio di sambuyá ‘1000 steps’ na Kaminda Turístiko. Entre 10.15 or i 10.30 or di mainta, deskonosínan a bai ku dos tas di lomba miéntras e okupantenan a kana bai e sitio menshoná i bin bèk. Ta trata di un tas di e marka ‘The North Face’ koló püs i un tas blou skur di e marka Nike. Den e tasnan tabatin entre otro pòtmòninan ku sèn kèsh, karchinan i sèrbètè.
Ta investigando e kasonan.
Entradanan hudisial i detenshonnan
Den oranan di mainta di djamars 28 di òktober, Kuerpo Polisial Hulanda Karibense(KPCN) a tene dos entrada hudisial en konekshon ku un kaso di kiebro ku a tuma lugá djaluna 27 di òktober den un akomodashon turístiko situá na E.E.G. Bulevar.
A tene entrada hudisial na un kas na Kaya Karañito i un kas na Kaya Monseigneur Nieuwindt. Durante e entrada hudisial a konfiská un arma di kandela, kantidat di supstansia probablemente narkótiko i den bisendario di un di e bibiendanan a enkontrá algun artíkulo probablemente prosedente di ladronisia.
A detené dos hòmber en konekshon ku e kaso aki; O.F.R.T. di 19 aña di edat i R.M.G. di 20 aña di edat.
Investigashon den e kaso ta kontinuá.
Detenshon pa maltrato
Djamars 28 di òktober, alrededor di 7.45 or di mainta, a detené un hòmber di inisial J.S.C.L. na un kas na Kaya Vivaldi. E detenshon tabata den kuadro di un investigashon andando tokante un kaso di maltrato ku a tuma lugá den e anochi di djadumingu 5 di òktober. A detené e sospechoso pa maltrato i menasa. Investigashon den e kaso ta kontinuá.
Vehíkulo na kandela
Djaluna 27 di òktober, alrededor di 12.40 or di mèrdia, ‘meldkamer’ sentral a risibí notifikashon tokante un vehíkulo na kandela riba e lugá di stashoná outo di un negoshi na Kaya Amsterdam. Na e sitio menshoná, polis a topa ku un pikòp na kandela. Brantwer a presentá i a paga e kandela. No tabatin herido.
Press release: Korps Politie Caribisch Nederland