Un grupo di dies parlamentario, consistiendo di fraccionnan di MEP, PPA y parlamentario Mike de Meza (AVP), a expresa nan profundo preocupacion y malcontento cu e decision di Presidencia di Parlamento pa no yama un reunion publico solicita oficialmente.
Segun Parlamentario Edgar Vrolijk, e peticion pa e reunion aki tabatin como obhetivo debati riba e situacion actual di pais Aruba y permiti pa cada miembro di Parlamento posiciona nan mes claramente: ken ta pro y ken ta contra e asuntonan den discusion Rijkswet HOFA. “A yega un momento cu bo no por keda sconde mas,Parlamentario Edgar Vrolijk a expresa
Violacion di Reglement van Orde
E punto di discusion principal ta basa riba e Reglement van Orde, cual ta e pilar fundamental cu ta regula e funcionamento interno di Parlamento. Vrolijk a recorda cu e reglamento aki tin un hierarquia halto, siendo mara directamente na nos Constitucion (Staatsregeling).
- Segun e regla, ora tres miembro of mas solicita un reunion publico, esaki mester wordo yama den un transcurso di 30 dia.
- Si pa algun motibo no por cumpli cu e plaso ey, e Presidente di Parlamento tin e obligacion di duna un motivacion debidamente fundamenta.
Motivacion cuestionabel
Pa sorpresa di e fraccionnan di oposicion, e respuesta ricibi for di Presidencia di Parlamento tabata negativo. E decision pa no yama e reunion a wordo basa riba cartanan ricibi for di fraccionnan di AVP y Futuro, kendenan a indica cu nan lo no duna quorum. Ademas, a menciona cu mester warda riba un “uiteenzetting” (explicacion) di Raad van Advies riba e leynan concerni prome cu por procedi.
E orador a cualifica e accionnan aki como un “abuso di poder” y un kiebro di e derechonan democratico di e representantenan di pueblo. “Ta un berguensa cu bo ta manda carta y bisa Presidente cu bo no ta duna quorum pa yama reunion,” Parlamentario Edgar Vrolijk ta , indica cu e asuntonan aki ta di Parlamento y no mester wordo stroba pa decisionnan di Gobierno of organonan consultivo den e fase aki. Sinembargo Presidente di Parlamento Marlon Sneek ta permiti esaki.
Consecuencia pa democracia
E falta di e reunion aki ta bisto como un tactica pa evita debate den un momento critico, un momento pa informa pueblo di Aruba di kico realmente ta Rijkswet HOFA y kico ta su efectonan , pero tambe kico ta loke e parlamentario nan ta para pe , parlamentario nan cu e pueblo di Aruba a vota pe. Cu 10 parlamentario para tras di e peticion, e oposicion ta considera cu tin suficiente representacion pa e debate tuma luga, y nan ta lamenta cu e coalicion actual ta uza nan posicion pa stroba e transparencia cu e pueblo di Aruba merece.