Den un reaccion fuerte publica riba su rednan social, e politico Otmar Oduber a lansa criticanan severo dirigi na Secretario di Estado Eric van der Burg. Oduber ta cuestiona e intencionnan di Hulanda tras di e fiansanan y supervision financiero, batiendo alarma riba e peliger cu esaki por nifica pa e Status Aparte y autonomia di Aruba. Van der Burg ta cana cu e mes un pochi sucu cu Minister Geoffrey Wever ta cana cu ne pa benta den bista y orea di pueblo, papia con dushi ta pa ricibi placa y e bahada di e porcentahe, pero no ta papia di e poder y e auntonomia cu Gobierno di AVP-FUTURO ta entrega na Hulanda kitando y kibra e autonomia di Pais Aruba.
Segun Oduber, si e condicionnan cu Hulanda ta propone tabata berdad asina beneficioso pa e isla, e proceso lo mester a cana legalmente segun e Statuut di Reino. E ta subraya cu e debe actual no a bini door di mal maneho local so, sino cu e ta un consecuencia directo di un crisis mundial cu a afecta tur pais.
Interes scondi? Oduber ta pone un pregunta critico pa e comunidad reflexiona riba dje: “Nos ta kere berdad cu placa ta wordo ofreci of duna na Aruba a cambio di supervision, sin cu Hulanda mes tin un beneficio propio tras di esaki?” Pa e politico, e contesta ta bisto. E ta argumenta cu e Status Aparte di Aruba semper tabata un “palo den wowo” pa e ambtenarnan y politiconan na Den Haag, y cu esey ta e punto unda mester busca e berdadera motibu tras di e exigencianan Hulandes.
Autonomia no ta negociabel Cu un tono firme, Oduber a declara cu e derecho di e pueblo Arubiano pa goberna su mes no ta algo cu por wordo negocia of bendi manera un articulo cualkier. “Nos autonomia den Reino no ta na benta riba eBay, y siguramente no cerca e pueblo Arubiano,” Oduber a enfatisa, cordando cu e lucha aki tin un historia largo cu ta data for di añanan 40.
Oduber ta kere fielmente cu den un Reino uni, partnernan mester trata otro cu respet mutuo y cumpli cu loke tin stipula den e Statuut, tanto den contenido como den e forma cu ta ehecuta esaki.
Amor pa libertad Pa clausura su mensahe, Oduber a referi na e letranan profundo di nos himno nacional, “Aruba Dushi Tera”, pa recorda e balornan fundamental di e pais. El a cita e parti cu ta bisa: “Grandeza di bo pueblo ta su gran cordialidad. Cu Dios por guia y conserva su amor pa libertad!”, reiterando cu e libertad y autonomia di Aruba mester keda proteha pa tur generacion y no wordo entrega manera Prome Minister Mike Eman ta entrega e lucha di su welo y tata hunto cu miniser Geoffrey Wever y Gerlien Croes.
ar Oduber