MetaCorp, hunto cu Beyond Sports Limit Foundation, ta hopi entusiasma di anuncia un evento unico cu lo tuma luga riba tur tres isla ABC pa prome biaha. Sosteniendo e slogan “Beyond Sports Limit Foundation & MetaCorp making a difference,” e fundacion lo enbarka riba un reto extraordinario, cual ta encera corre tres marathon den tres dia riba e islanan.
E evento MetaFit Walk & Run 2026 lo tuma luga pronto riba 28 di juni na Aruba. Pa promove un mayor inklusion den nos comunidad di necesidadnan special, Beyond Sports Limit Foundation, cu MetaCorp como sponsor principal, a dicidi di organisa un reto di marathon di tres dia. Nan lo corre 42 kilometer na Boneiro dia 26 di juni, sigui pa otro 42 kilometer na Corsou e siguiente dia, y lo completa e ultimo 42 kilometernan na Aruba diadomingo 28 di juni, durante e actividad di MetaFit.
Durante e caredanan na Boneiro y Corsou, nan lo corre usando tres stoel special. Dos atleta special di Aruba lo participa den e reto, mientras cu un atleta special local di cada isla respectivo a wordo invita pa structuralmente forma parti di e experiencia. Na Aruba, e marathon lo conclui cu cinco atleta special. Maske cu Beyond Sports Limit Foundation a yega di participa caba den diferente evento riba e islanan, esaki ta e prome biaha cu un reto di e magnitud aki ta wordo organisa consecutivamente riba tur tres isla den un periodo di tres dia tras di otro.
Trahando cu un “buddy system” (sistema di compañero), cada atleta special lo wordo acompaña pa un atleta di Beyond Sports Limit Foundation. E compañeronan aki ta garantisa cu e atleta special por disfruta plenamente di e experiencia, manteniendo tur medida di seguridad necesario durante henter e ruta.
Ademas di MetaFit, MetaCorp y su subsidiarionan tin un programa extenso di actividadnan deportivo, social, cultural y educativo. Di e forma aki, e compania ta demostra su compromiso cu su empleadonan y cu comunidad. Basa riba mas di 100 aña di tradicion, e cultura di MetaCorp ta enfoca riba investe den e factor humano, promoviendo bienestar y satisfaccion cerca su empleadonan, kendenan na nan turno ta brinda un servicio excelente na nan clientenan.
Beyond Sports Limit Foundation a wordo funda na november 2022 door di Brainer Lampe, inspira pa e ideologia di Dijondrick Jacobs cu tur persona, sin importa nan limitacionnan, mester tin e oportunidad di persigi nan pasion, cumpli cu nan soñonan, y surpasa nan propio limitenan. Awe, e fundacion tin 44 atleta special, 13 boluntario conoci como “buddies”, 5 stoel di ruda, 3 baisis special y 2 kayak special. Desde su inicio, e organisacion a conta cu e apoyo incondicional di MetaCorp den tur su proyectonan, permitiendo cu mas hende cu necesidadnan special por participa activamente den deporte y recreacion.
