MAN-PIN den e reunion riba placa di vacacion siman pasa, a señala cu Gobierno a purba pasa pueblo un “fastball” y regla su “pastechi” dor di inclui placa di vacacion di politiconan den e mesun ley di placa di vacacion di ambtenaar. Esaki ta sin mas contra regla di moralidad y etica, sigur ora gobierno no ta cumpli cu su deber di indexa AOV segun ley.
Ademas manera MAN-PIN a pone den un carta dialuna ultimo pa Minister Presidente Pisas, gobierno mester separa e ley di ambtenaar for di e dos otro leynan ya cu Gobierno no a manda e ley pa politiconan pa Raad van Advies pa conseho riba nan dos. Nos Areglo di Estado ta exigi pa atende beneficionan di parlamentarionan cu sosten di 2/3 parti di parlamento, esta 14 voto.
E proposicion di MAN-PIN ta pa no stroba ni tarda e lei di placa di vacacion pa e ambtenaar, cu por keda aproba den Parlamento cu un mayoria di 11 voto. Gobierno a entrega diabierna ultimo, 28 di november 2025, contesta riba preguntanan di fraccion di MAN-PIN y acepta cu e obhecionnan di MAN-PIN pa cu e procedura legal cu mester a sigui. Raad van Advies den un carta di mesun fecha, tambe ta hala horea di gobierno fuertemente riba e fayo contra ley di parti di gobierno pa no scucha Raad van Advies.
Tambe Raad van Advies ta atende cu gobierno riba ponemento di un ley cu ta exigi un mayoria di 14 voto hunto cu un ley cu ta exigi 11 voto. Por mira cu Raad van Advies a uza e mesun argumentonan cu MAN-PIN pa mustra cu gobierno ta actua contra di ley. Gobierno a bin awor cu un ‘Nota di Cambio’ pa atende solamente e ley di ambtenaar manera Fraccion di MAN PIN a propone. MAN-PIN ta contento cu sano huicio a prevalece. A keda demostra un biaha mas cu e rol di un oposicion serio basa riba democracia y moral ta yuda coregi mal gobernacion.