E contracto entre dokter Corina Rolfast y OE AZV ta termina. Nos ta gradici dokter Corina Rolfast pa e servicio cu el a brinda nos aseguradonan.
1 di september 2022
Entrante 1 di september 2022 un traspaso automatico ta bay tuma luga. Tur pashent inscribi cerca dokter Corina Rolfast ta wordo pasa automaticamente pa e dokter di cas nobo, esta dokter Percey Lasten. Servicio medico ta continua via e mesun adres y number di telefon, esta Santa Cruz 52, number di telefon 5822222. Pa esnan cu tin e AZV app, lo wak e cambio aki den e Menu →bo dunadonan di cuido. Si bo no tin e AZV app ainda, nos ta invita bo pa download esaki y registra pa bo digi-ZorgPas.
Dokter di cas nobo
Dokter Percey Lasten ta un dokter naci na Hulanda pero cu a biba varios aña na Aruba. El a studia medicina general na Radboud Universiteit Nijmegen y despues a specialisa pa dokter di cas na Maastricht. Cu hopi experiencia y passion, dokter Percey Lasten ta cla pa yuda su pashentnan. Ta di menciona cu dokter Percey Lasten ta domina bon e idiomanan Hulandes, Papiamento, Ingles y hasta razonablemente bon Spaño.