Alan Howell, miembro di Fraccion di POR durante reunion di Parlamento pa trata e fondonan cu Hulanda a pone disponibel pa atende e problematica di migrantenan, a indica cu tin biaha bo tin cu duna ‘Jack his jacket’. “Si no ta pa e placa aki, e 11 miyon Florin cu Hulanda a duna pa yuda bringa e situacion di e ciudadanonan cu ta busca tur manera pa haya un miho bida y ta bin Aruba den forma ilegal”, por ofrece un miho proteccion na nos pais y nos ciudadanonan.
Howell ta indica cu ta danki na e placa aki hopi trabou a wordo eherci pa proteha nos frontera, nos pais y nos ciudadanonan pasobra sin e fondonan aki no lo por a bringa pa proteha nos pais.
El a duna un pluimpje na tur e instancianan hudicial y na Minister Bikker cu a logra esaki pasobra por mira e trabou incansabel di tur instancia hudicial pa combati entrada di ilegalnan na nos isla y ta expresa cu e ta sostene idea di colega Tjon pa dedica parti di e fondonan aki pa e ‘uitrustingnan’ pa esnan den ramo hudicial.
Por wak cu 75 mil Florin di e suma a wordo dedica pa manda esnan ilegal bek nan pais y ultimo temponan por a mira cu varios persona a bay bek. Pa haya mas detaye riba esaki, el a pidi Minister di Husticia informacion di cuanto hende a wordo repatria?
Tambe Alan Howell a bisa cu na e momentonan aki tin 224 mil Florin disponibel ainda, pesey el a pidi Minister di Husticia pa duna un splicacion amplio di kico por haci cu e placa aki.
Na Minister di Enseñansa el a puntra con ta atendiendo cu e situacion di studiantenan ilegal y cuanto placa ta wordo detina pa cu esaki
Finalisando, Howell a encurasha gobierno pa sigui traha duro y duna nos ciudadanonan e siguransa cu nos ta bay ta sigur y protehi den cuadro di e situacion cu nos ta bibando aden cu pais bisiñaVenezuela.
