Parlamentario Alvin Molina den conferencia di prensa a elabora riba actonan penal cometi door di hobennan y e preocupacion cu ta existi pa esaki bou di comunidad. E ta preocupa pa e hobennan mes, pa e falta di trankilidad cu esaki e ta causa den comunidad y pa e efecto cu e tin riba turismo.
Prome cu tur cos mester contesta pakico e muchanan ta coy mal direccion y e ta puntra su mes cual ta e aspectonan cu ta contribui na e caminda aki cu nan ta tuma. Pero loke e tin contesta riba dje si ta cu e solucion no ta solamente tira tur e “boef”nan den prizon y cos a caba. Tin diferencia di opinion riba con pa atende cu e problematica aki, tanto bou di comunidad como den Parlamento. Tin diferente debate caba a tuma luga, Molina a bisa. Hasta a presenta mocionnan.
E Parlamentario a splica cu el a studia tur e puntonan menciona y e ta kere cu mester tin un debate mas profundo. P’esey el a pidi pa un reunion unda e unico punto ta ‘criminalidad bow hobennan’. El a menciona cu esaki lo wordo trata den e comision fiho di husticia, cu Molina mes ta presidente di dje, hunto cu stakeholders.
Un di e prome preguntanan cu mester wordo haci, si ta recomendabel pa impone mas castigo riba e hobennan cu a comete un acto penal. Si e contesta ta ‘si’, mester studia con ta bay atende cu e pensamento ey.
Un otro punto cu lo bin pa dilanti den e reunion ta: con pa baha criminalidad bou di hobennan. E ta di acuerdo cu Minister di Husticia cu pa atende cu criminalidad mester inverti den henter e cadena hudicial, cu ta consisti di 5 fase, cualnan ta: 1) Prevencion, tur ministerio y comunidad tin nan responsabilidad den esaki;. 2) Opsporing; 3) Vervolging; 4) e tempo cu e persona ta pasa den KIA; 5) Reintegracion.
E reunionnan ta cuminsa diahuebs 19 mei cu KIA, Directie Sociale Zaken, y Stichting Reclassering & Jeugdbescherming. Den e siguiente reunion lo topa cu Directie Wetgeving & Juridische Zaken, Ministerio Publico y Cuerpo Policial.
E reunion di comision lo no ta publico, esaki pa tur hende por expresa nan mes di forma habri. Na final lo informa of duna un resumen di ki maneho e stakeholdernan ta recomenda.