Dialuna mainta Parlamentario Alvin Molina tabata presente na conferencia di prensa di Gobierno di Aruba, unda Minister Endy Croes a anuncia inicio di renobacion di scol basico St. Aloysius. E mandatario a presenta un video di e diseño y renobacion di e scol. Un scol hopi moderno. E trabounan di construccion pa cu e proyecto ta consisti di renobacion di e hala noord, zuid, biblioteca, oficina y gymlokaal. Si tur cos bay bon manera ta programa e alumnonan lo por ta bek den nan scol prome cu fin di e aña aki. Nos ta papia di un inversion di alrededor di 2 miyon florin.
Molina a expresa di tin un aprecio masha grandi pa Minister Endy Croes pe inicio di e proyecto bunita aki. Na varios ocasion a wordo menciona cu no tin suficiente placa riba e presupuesto, pero esaki ta un ehempel con colaboracion, creatividad y den union e ta posibel pa nos realisa e tipo di proyectonan asina cu tin un impacto grandi. Enseñansa ta hopi importante, esaki sigur ta un bunita noticia pa enseñansa na Aruba y pe districto di Noord y dimes ta warda pa e scolnan di San Nicolas tambe. Pabien Sint Aloysius.