Den e debate parlamentario recien, Parlamentario di fraccion di MEP, Xiomara Maduro, a cuestiona fuertemente e postura di Minister Gerlien Croes encuanto e polemica di su viahe den un jet priva. Segun Maduro, e mandatario ta purba desvia atencion door di sconde tras di legislacion internacional, miéntras cu e exigencia ta keda simpel: transparencia total pa medio di un recibo.
Durante su intervencion, Parlamentario Maduro a rechasa e argumento di e mandatario cu, debi cu e avion tin licencia Mericano, e leynan local no lo ta aplicabel den e contexto aki. “E Minister ta lubida cu e avion ta viaha bou di licencia y esey ta implica cu locual ta wordo haci akinan, ta conta pa e leynan local,” Maduro a subraya, indicando cu e Minister Gerlien Croes ta busca maneranan cada bes mas complica pa evita di duna contesta concreto na pueblo.
Salvaguardia e sistema democratico
Maduro a enfatisa cu e cuestionamento aki no mester wordo mira como un ataque personal, sino como un cumplimento di e debernan constitucional cu Parlamento tin. Den nos sistema democratico, un Minister tin e obligacion di contesta pregunta di e representantenan di pueblo pa salvaguardia integridad di e gobernacion.
“E pregunta cu tin dilanti ta: e recibo. Mustra nos e recibo. Y esey ta locual cu e Minister tin cu presenta y tur cos ta caba,” e parlamentario a declara.
Falta di respet y integridad
Un punto cu a hala hopi atencion den e disertacion di Maduro tabata e actitud di Minister Gerlien Croes den sala di Parlamento. Segun e parlamentario, e Minister ta “bahatellisa” (trivialisa) e situacion, actuando di un forma cu por wordo considera como un bofon pa e gravedad di e caso.
Maduro a corda e mandatario cu, como Minister encarga cu no menos cu cinco cartera, e tin un responsabilidad enorme riba su custia. “Hopi poder ta bini cu hopi responsabilidad. Si bo no por mustra un recibo pa un cos asina chikito pa hende por kere den bo palabra, kico nos por spera di e responsabilidadnan mas grandi?”
Integridad den wega
E punto central di e critica ta e posibel kiebro di integridad. Maduro a reitera cu un Minister, bou di ningun circunstancia, por acepta un viahe den jet priva como un “regalo”. Pa e motibo ey, e fraccion di MEP ta keda exigi claridad absoluto riba ken a paga pa e buelo ey.
Lamentando e falta di transparencia, Maduro a conclui cu e falta di informacion conforme ley ta stroba e proceso democratico y ta perhudica e derechonan di e ciudadanonan di Aruba di ta debidamente informa riba e actuacion di nan gobernantenan.