Parlamentario Xiomara Maduro di fraccion di MEP a manda dia 22 di juli 2025 un serie di preguntanan na Ministro di Finansa, sr. Geoffrey Wever, relaciona cu desaroyonan reciente den e companianan di utilidad: WEB Aruba N.V., N.V. ELMAR y Utilities N.V.
E 11 preguntanan haci ta trata e cambio di comisarionan cu ta tumando lugar na e companianan di utilidad, sin cu e reglanan di “good corportate governance” ta wordo sigui. Maduro ta expresa su preocupacion pa e nombracionnan cu ta wordo haci sin aprobacion previo di e lenders kendenan ta institutonan financiero cu ta presta e companianan di utilidad placa, y cu segun contracto mester aproba tur comisario prome cu nan por cuminsa traha como tal.
Maduro ta expresa temor cu e situacion por tin consecuencia financiero serio, incluyendo un posibel “default tecnico” cu por pone na riesgo e capacidad di e companianan di utilidad pa sigui inverti den infrastructura vital manera energia sostenibel y expansion di rednan.
Den su carta, Maduro ta pone enfasis riba e responsabilidad di e Gobierno y particularmente e Minister di Finansa, como doño y unico shareholder pa garantisa bon gobernacion y un maneho responsabel den e empresanan vital aki. Un di e preguntanan ta cuestiona e rol di Minister di Finansa den e proceso di nombracion di comisario, y ta cuestiona e motibo cu e mandatario ta scoge pa tuma vakantie net den un periodo cu tanto riesgo financiero ta loer na e companianan di utilidad.
“Nos pueblo mester transparencia y stabilidad. E companianan estatal ta esencial pa nos bida diario y pa e desaroyo economico di Aruba. Gobernacion responsabel no ta opcional, ta un obligacion,” segun palabra di Xiomara Maduro.
E Parlamentario di MEP ta spera un contesta por escrito dentro di dos siman.
