Aña 2020 ta tras di lomba i 2021 a inisiá, pero ainda mundu kompleto ta den e gara di e pandemia global di e Corona virùs (COVID19). Aña 2021 ta brindando e perspektiva pa e bakuna ku lo por trese un dominio riba e kontagio di e vírùs aki. Meta di e bakuna ta pa aktivá e sistema imunologiko di defensa kontra malesanan pues duna protekshon kontra di e vírùs ku ta kousa Covid-19. Esaki mester redundá den ménos kasonan mortal, ménos hospitalisashon i ménos personanan ku pa motibu di malesa lo ta inkapas pa ehersé nan labor òf nan aktividatnan diario, pues ku ménos impakto riba e produktividat individual i esun kolektivo den nos pais pa ku e aspekto ekonómiko tambe. Esaki ta un forma tambe naturalmente pa yega na kontrol riba gastunan di salubridat públiko, ku pa motibu di e pandemia a subi drástikamente den e último aña i lo sigui tin su impakto den aña 2021. Na Kòrsou nos pueblo tambe ta den ekspektativa pa e bakunanan ku ya ta riba merkado i ku su aplikashon a inisiá kaba na diferente pais manera Merka, Inglatera, Israel i vários otro pais di Union Europeo. Manera a sali den publisidat e siman aki, 8 di yanüari próksimo bakunashon lo start den paisnan di Reino Hulandes tambe. Mi kièr aksentuá ante todo ku e desishon di kada siudadano pa tuma e bakuna ta keda unu basá riba boluntat propio, konvikshon propio, responsabilidat propio i propio sano huisio. Nunka un persona lo por wòrdu obligá pa tuma un bakuna kontra di su boluntat!
Relashona ku tur loke ta ariba menshoná sr Schoop a aserka Minister di Salubridat, Medio Ambiente i Naturalesa, sra. Zita Jesus-Leito, ku e siguiente preguntanan:
- Ki dia ta programá pa e promé bakunanan pa Covid-19 yega nos pais Kòrsou?
- Ki dia bakunashon kontra di e Covid-19 di nos pueblo lo inisiá, esaki lo ta pareu ku Hulanda i/o otro paisnan den Reino?
- Kon e transporte di e bakunanan lo tuma lugá for di eksterior i lokal i kon ta garantisá ku lo mantené e reglanan di konservashon apropiá manera e temperatura adekuado, empake, sterilidat, informashon na e idioma legal pa i komprendibel pa e usuarionan etc di e bakunanan?
- Ta sòru pa tin disponibilidat pa frizernan pa spesialmente konservashon di e bakunanan en partikular esun di Pfizer-Biontech?
- Kwa ta e eskoho di e bakuna ku nos lo apliká na Kòrsou, esaki ta bai ta esun Merikano di Pfizer of di Moderná òf lo ta esun Ingles di Astra Zeneca of esun Sputnik V prosedente di Russia?
- Kiko ta e kantidat di bakunanan ku lo bai ta disponibel na Kòrsou i kiko lo ta e gastunan korespondiente pa nos presupuesto di salubridat públiko? Reino Hulandes lo yuda kubri ku (parti) di e gastunan?
- Kon e atministrashon di e bakuna ta bai wòrdu organisá aki nan, via di kua profeshonalnan òf kua instansianan di kuido esaki lo bai wòrdu apliká?
- Kua ta e gruponan di siudadanonan ku lo bini na remarke pa e bakuna, kua ta e gruponan di riesgo identifiká pa Ministerio di GMN? Kwa ta e prioridat ora ta bakuna gruponan?
- Ta bèrdat ku na Kòrsou tambe lo kuminsá promé ku esnan ku ta traha den e sektor di kuido?
- Dòkternan di kas i dentistanan tambe lo forma parti di e grupo aki?
- Muchanan bou di 18 aña tambe lo wòrdu bakuna?
- Den kuantu tempu a plania pa bakuna pueblo di Kòrsou?
- Minister por indiká si ta bai introdusí un “Pasport òf Sédula” di bakunashon kontra Covid-19 ?
- Kon lo bai informá pueblo di e kampaña di bakunashon, e logístika korespondiente i kon esaki ta bai ta repartí den e diferente regionnan di nos país, pa no influensia e aksesibilidat negativamente?
- Inspekshon di Salú òf Komishon di registro di medikamentunan ta bai tin un ròl pa ku aseptashon di e bakuna riba nos merkado lokal, kisas via di botikanan òf nos servisio di salú públiko manera G&GZ?
- Kon Minister ta bai sigui konsientisá riba e medidanan di distansia físiko, aglomerashon,nbistimentu di tapa boka, higiena personal i di áreanan di kontakto, apesar di e bakunashon, mirando ku un persona bakuná por laga di bira (gravemente) malu pero por tin un potensial pa kontaminá otronan?
